قازاقستاندا 2016-جىلى ستۋدەنتتەردى جاتاقحانامەن قامتۋ 80 پايىزعا جەتەدى

بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگتە ق ر ءبىلىم جانە عىلىم ۆيتسە-ءمينيسترى تاحير بالىقبايەۆ ايتتى.

ونىڭ ايتۋىنشا، ەلىمىزدە بۇگىندە بارلىق ستۋدەنتتەردىڭ 60 پايىزى جاتاقحانامەن قامتاماسىز ەتىلگەن. «بۇگىندە قازاقستاندا جاتاقحانادا تۇرعىسى كەلەتىندەردىڭ 60 پايىزى قامتىلعان. ءبىراق ءبىز بۇل كورسەتكىشتى جەتكىلىكتى دەپ ەسەپتەمەيمىز. سوندىقتان مينيسترلىك ستۋدەنتتەردى جاتاقحانامەن قامتۋدىڭ ارنايى باعدارلاماسىن ازىرلەپ، بىرنەشە جىل بويى سول جوسپار بويىنشا جۇمىس جاساپ كەلەمىز»، - دەپ اتاپ ءوتتى ۆيتسە-مينيستر.

اتالعان باعدارلاما بويىنشا بيىل قازاقستاندا 7 جاتاقحانا پايدالانۋعا بەرىلەدى دەپ جوسپارلانعان. «بيىل 3 جاتاقحانانى تاپسىرىپ قويدىق دەپ ايتۋعا دا بولادى. ال قالعان تورتەۋىن جىل سوڭىنا دەيىن قولدانىسقا بەرەمىز. كەلەسى جىلى 11 جاتاقحانانىڭ قۇرىلىسى باستالادى. مۇنداعى ءبىزدىڭ ماقساتىمىز 2016-جىلعا قاراي ستۋدەنتتەردىڭ 80 گە جۋىق پايىزىن جاتاقحانامەن قامتاماسىز ەتۋ بولىپ وتىر. ياعني، بيۋجەتتەن وسىعان جەتكىلىكتى قاراجات بولىنگەن»، - دەدى ت. بالىقبايەۆ.

اۆتور: ءابۋ-اسقار مەكەش ۇلى