اسەل ساعاتوۆا، ايدىن ايىمبەتوۆ «قازاقستان ارۋى-2015» بايقاۋىندا قازىلىق ەتپەك - فوتو
وعان قازاقستاننىڭ ءار وڭىرىنەن 30 ارۋ قاتىسادى.
ولاردىڭ ىشىندە وقۋشى قىزدار، مەملەكەتتىك قىزمەتكەرلەر، ءبىر جۋرناليس، حالىقارالىق زاڭگەر، كاسىپكەرلەر دە بار. دەگەنمەن ولار وسىناۋ جوعارى دەڭگەيدەگى بايقاۋعا باقتارىن سىناۋعا كەلگەن.
بايقاۋدىڭ ءادىل ءارى اشىق ءوتۋى ءۇشىن ەلىمىزدىڭ ەڭ سۇلۋ ارۋىن قازاقستاندىقتاردىڭ وزدەرى، ونلاين جانە س م س ) كەلتە حات ( داۋىس بەرۋ ارقىلى تاڭداي الادى. ايتا كەتۋ كەرەك، الدىمەن ەڭ ۇزدىك ۇشتىكتى قازىلار القاسى انىقتايدى.
«مەن قازىلار القاسىنا تاعايىندالعان ادامداردىڭ ەسىمىن جاريالاعىم كەلەدى - ولار ەلىمىزدىڭ تانىمال ءارى قۇرمەتتى ازاماتتارى: قازاق ۇلتتىق ونەر ۋنيۆەرسيتەتىنىڭ رەكتورى ايمان مۇساقوجايەۆا، «استانا» فۋتبول كلۋبىنىڭ باس مەنەدجەرى قايسار بەكەنوۆ، عارىشكەر ايدىن ايىمبەتوۆ جانە اكتريسا اسەل ساعاتوۆا. بيىل بايقاۋدا ەڭ بەدەلدى قازىلار القاسى تورەلىك ەتەتىن بولادى. ول كىسىلەردى بارشا قازاقستان تانيدى»، - دەيدى بايقاۋدىڭ جۇرگىزۋشىسى دينارا ساتجان استانادا وتكەن باسپا ءسوز ءماسليحاتىندا.
سونىمەن قاتار قازىلار قاتارىندا «ميلوسەرديە» قايىرىمدىلىق قورىنىڭ ديرەكتورى ارۋجان ساين، ۆەلوشاباندوز الەكساندر ۆينوكۋروۆ، «استانا جاستارى» جاستار ورتالىعىنىڭ باسشىسى ءانۋار نۇپەيىسوۆ، «التىن وردا» اۆتورلىق ديزاين ءۇيىنىڭ ەتنو- ديزاينەرى ىرزا تۇرسىنزادا جانە «قازاقستان ارۋى» بايقاۋىنىڭ پرەزيدەنتى الەنا ريۆلينا- كىرباسوۆا بار.
2015 -جىلى ۇيىمداستىرۋشىلار بايقاۋدا ناعىز شوۋ بولادى دەپ ۋادە بەرۋدە. باس رەجيسسەر رەتىندە جاس اكتەر ءارى رەجيسسەر ماكسيم اكباروۆ تاڭدالىپتى.
بايقاۋدىڭ سالتاناتتى ءراسىمىن تانىمال تەلەجۇرگىزۋشى دينارا ساتجان مەن جاس اكتەر تاۋەكەل ءمۇسىلىم جۇرگىزەدى.
ايتا كەتكەن ءجون، جەڭىمپاز «قازاقستان ارۋى-2015» اتاعىنا يە بولىپ قانا قويماي، 5 ميلليون تەڭگەنى دە ولجالايدى.
بىلتىر، «قازاقستان ارۋى-2014» بايقاۋىندا 22 جاسار رەگينا ۆاندىشيەۆا جەڭىمپاز اتانعان ەدى.
