ە. قارين: 2014 -جىلى الەمدە 13 مىڭ لاڭكەستىك شابۋىلدان 30 مىڭنان اسا ادام قازا بولعان
لاڭكەستىك ارەكەتتەردىڭ سالدارىنان 30 مىڭنان اسا كىناسىز ادام قازا بولعان. بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگ بارىسىندا قازاقستان ستراتەگيالىق زەرتتەۋلەر ينستيتۋتىنىڭ ديرەكتورى ەرلان قارين ءمالىم ەتتى.
«الەم بويىنشا تەرروريزم قاۋىپى كۇشەيمەسە، سەيىلمەي تۇر. پاريجدەگى لاڭكەستىك پەن مىسىرداعى ۇشاق اپاتى قازىر باستى نازاردا بولعانىمەن، لاڭكەستىك ارەكەتتەردىڭ كوبەيۋى بۇرىننان بايقالىپ كەلە جاتقان ۇدەرىس. جالپى، تەرروريزم اكتىلەرىنىڭ كوبەيۋى 2000 -جىلداردان، اسىرەسە، 2005 -جىلدان بەرى قاتتى بايقالىپ كەلەدى. ەگەر، وسى ۋاقىتقا دەيىن الەم بويىنشا جىلىنا 500-600 تەررورلىق ارەكەت ورىن الىپ كەلگەن بولسا، 2005 -جىلدان بەرى جىلىنا 100 مىڭنان اسا لاڭكەستىك ارەكەت جاسالاتىن بولعان. تەرروريزم ماسەلەلەرىن زەرتتەۋ جونىندەگى مونتەرەي(حالىقارالىق زەرتتەۋلەر ينستيتۋتى - رەد.) ورتالىعىنىڭ مالىمەتىنە سۇيەنسەك، 2014 -جىلى الەمدە 13 مىڭنان اسا لاڭكەستىك شابۋىل ورىن السا، وسى لاڭكەستىك ارەكەتتەردىڭ سالدارىنان 30 مىڭنان اسا ادام قازا بولعان»، - دەيدى ە. قارين.
ونىڭ ايتۋىنشا، الەمدە تىركەلىپ جاتقان لاڭكەستىك ارەكەتتەردىڭ 60 پايىزى نەبارى 5 مەملەكەتكە تيەسىلى. بۇلار - پاكىستان، اۋعانستان، يراك، ءۇندىستان جانە نيگەريا ەلدەرى.
«وكىنىشكە وراي، لاڭكەستىك ارەكەتتەردىڭ سانى ارتقان سايىن، اجال قۇشقان بەيبىت تۇرعىنداردىڭ دا سانى كوبەيىپ بارادى. ساراپشىلاردىڭ پايىمداۋىنشا، 2001 -جىلى ا ق ش- تىڭ اۋعانستانعا، 2003 -جىلى يراكقا ەنۋى تاياۋ شىعىس پەن وڭتۇستىك ازيا وڭىرىندەگى جاعدايدى ۋشىقتىرىپ جىبەرگەن. الەمدە تىركەلىپ جاتقان لاڭكەستىك ارەكەتتەردىڭ 60 پايىزى نەبارى 5 مەملەكەتكە تيەسىلى. بۇلار - پاكىستان، اۋعانستان، يراك، ءۇندىستان جانە نيگەريا ەلدەرى. سونىمەن قاتار، الەم بويىنشا لاڭكەستىك ارەكەتتەردەن قازا تاپقانداردىڭ جارتىسىنان كوبىنىڭ ءولىمى ءۇشىن بوكو حارام مەن يگيل توپتارى جاۋاپكەرشىلىك العان»، - دەيدى ە. قارين.
وزگە دەرەككوزدەرىنە سۇيەنسەك، ي گ ي ل توبى ءار ءتۇرلى لاڭكەستىك ارەكەتتەردە قازا تاپقان 20 مىڭنان اسا ادامنىڭ ءولىمىن موينىنا العان.
اۆتور: كەنجەكەي توقتامۇرات قىزى
