تۇرمە اۋرۋحاناسىندا جۇمىس ىستەيتىن حيرۋرگ 20 جىلدا 100 مىڭنان استام وتا جاسادى
سەمەي. قازاقپارات - سەمەي قالاسىنداعى ش ق و بويىنشا ق ا ج د و ۆ-156/15 تۇزەتۋ مەكەمەسىندە رەسپۋبليكالىق سوماتيكالىق اۋرۋحانا ورنالاسقان. وندا قازاقستاننىڭ بارلىق تۇرمەلەرىنەن سوتتالعاندار ەمدەلۋگە كەلەدى.
اۋرۋحانادا ءوز ءىسىنىڭ ناعىز ماماندارى جۇمىس ىستەيدى، ولار دارىگەر ماماندىعىن جۇرەك قالاۋىمەن تاڭداعان. سونىڭ ءبىرى - حيرۋرگ دارىگەر، مەديتسينالىق مەكەمەنىڭ حيرۋرگيا ءبولىمىنىڭ مەڭگەرۋشىسى - رۋسلان نايمانبايەۆ.
«بالا كۇنىمنەن مەنى كوپتەگەن ماماندىقتار قىزىقتىردى. كاسىبي سپورتپەن اينالىسقانىم دا بار. ۋاقىت وتە كەلە ماقساتىم، باعىتىم وزگەردى. مەكتەپ بىتىرگەننەن كەيىن شەشىم قابىلدادىم: دارىگەر نەمەسە اسكەري ادام بولامىن! ءسويتىپ، ەكى وقۋ ورنىنا - الماتى اسكەري اكادەمياسىنا جانە سەمەي مەديتسينالىق ينستيتۋتىنا ءتۇستىم. ينستيتۋتتى بىتىرگەننەن كەيىن دارىگەر ماماندىعىن تاڭدادىم. 1996 -جىلى اۋداندىق اۋرۋحاناعا جۇمىسقا تۇرىپ، ءتورت جىل جۇمىس ىستەدىم. سودان كەيىن كولونياعا دارىگەر- حيرۋرگ بولىپ اۋىستىم»، - دەيدى رۋسلان نايمانبايەۆ.
اق حالاتتى ابزال جان وسى مەكەمەدە 20 جىلدان استام قىزمەت اتقارىپ، زەينەتكەرلىككە شىعىپتى. قازىر زەينەتتە بولسا دا بۇل ۇجىمدا جۇمىسىن جالعاستىرىپ، سوتتالعانداردى ەمدەۋدە.
«العاشقى جاساعان وتام ءالى كۇنگە دەيىن ەسىمدە. ول كەزدە ءتورتىنشى كۋرس ستۋدەنتى ەدىم، وبلىستىق اۋرۋحانادا ءىس- تاجىريبەدەن ءوتىپ جۇرگەنمىن. جول اپاتىنا تۇسكەن كىشكەنتاي بالانى كوپتەگەن جاراقاتتارمەن الىپ كەلدى. العاش رەت ءوزىم وتا جاساپ تۇرعان سوڭ ءسال قوبالجۋ بولدى. قۇدايعا شۇكىر، ءبارى ويداعىداي ءوتتى. قازىر اپتالداي ازامات بولعان سول بالانىڭ دەنساۋلىعى جاقسى، شەتەلدە تۇرادى. كولونيادا جيىرما جىل ىشىندە سوتتالعاندارعا 100000 مىڭعا جۋىق وتا جاسادىم»، - دەپ ەسكە الدى ول.
دارىگەردىڭ ايتۋىنشا، جۇمىستا ءارتۇرلى ناۋقاستار كەزدەسەدى، كۇتپەگەن جاعدايلار بولادى. «سوتتالعان ادام ءبىرىنشى كەزەكتە مەنىڭ پاتسيەنتىم. سودان كەيىن عانا ول قاراقشى، ۇرلىقشى نەمەسە الاياق. ماقساتىم - ولاردىڭ ءومىرىن ساقتاپ قالۋ، اۋرۋدان ايىقتىرۋ. تەمىر توردا جازاسىن وتەپ جاتقانداردىڭ بارلىعى، مەن ءۇشىن - ناۋقاستار. دارىگەر بولعاندىقتان ەشكىمدى الالاماي، بارىنە بىردەي كومەك كورسەتۋگە ءتيىسپىن. كەيدە ادامدى قۇتقارا المايتىن كەزدەر دە بولادى. كوبىندە سوتتالعاندار ءوز وزدەرىنە اۋىر جاراقاتتار سالادى. مىسالى، ا. ەسىمدى ازامات ىشىنە پىشاق سۇعىپ العان ەدى. بۇل وتە قيىن جاعداي بولدى. سوتتالعاننىڭ ءومىرىن ارەڭ ساقتاپ قالدىم. كەيىننەن ول ريزاشىلىعىن ءبىلدىرىپ، راحمەتىن ايتتى. بۇل وقيعانىڭ ەسىمدە قالعان سەبەبى - ءولىم اۋزىندا جاتقان سوتتالعاننىڭ تۋعان ءىنىسى دە وسى كولونيادا جازاسىن وتەگەن بولاتىن. سول كەزدە وتا بولمەسىنىڭ الدىندا ءىنىسى «اعامدى قۇتقارىڭىزشى» دەپ جىلاپ كەلگەن- تۇعىن»، - دەيدى رۋسلان نايمانبايەۆ.
حيرۋرگتىڭ ومىرلىك ۇستانىمى: «اركەز قاراپايىم، مەيىرىمدى بولۋ!». كەيىپكەرىمىزدىڭ ۇلى اكەسى سياقتى وسى سالانى تاڭداپتى. ول بارناۋل مەديتسينالىق ينستيتۋتىنىڭ بەسىنشى كۋرس ستۋدەنتى، بولاشاق حيرۋرگ.
«ءاربىر جاس حيرۋرگقا تاباندىلىق، ەڭبەكقورلىق قاجەت. اركەز ءوزىن- ءوزى جەتىلدىرىپ، وقۋدان شارشاماي، كۇن سايىن دامىپ كەلە جاتقان مەديتسينا جاڭالىقتارىنان حاباردار بولۋى ءتيىس. ەگەر ءسىز ءوز شەشىمىڭىزگە كۇماندانساڭىز، وندا تاجىريبەلى مامانداردان كەڭەس الىپ، ارىپتەستەرىڭىزبەن اقىلداسىڭىز. ال ەگەر سەنىمدى بولساڭىز، وندا ءبارىبىر دە تاعى ءبىر رەت ءوز ءبىلىمىڭىزدى تەكسەرىڭىز. سەبەبى ءسىز ادام ادام ومىرىنە تىكەلەي جاۋاپتىسىز!»، - دەپ اتاپ ءوتتى دارىگەر.
اۆتور: تالعاتجان مۇحامەتبەك ۇلى
