قازاقستاندا 2,5 ميلليون ادام باسپاناعا مۇقتاج
وتكەن جىلدىڭ سوڭىندا باسپاناعا مۇقتاجداردىڭ سانى 2,5 ميلليون ادامعا نەمەسە حالىقتىڭ 14 پايىزىنا جەتتى. 2030 -جىلعا قاراي ب ۇ ۇ ستاندارتتارىنا جەتۋ ءۇشىن ەلىمىزدە الداعى 14 جىلدا تۇرعىن ءۇي قورىن 2 ەسە ۇلعايتۋ قاجەت. تۇرعىن ءۇي قورىنىڭ ورتاشا جىلدىق ءوسىمى 5 پايىزدان تومەن بولماۋى ءتيىس. سوڭعى ءۇش جىلدا بۇل كورسەتكىش 0,7 پايىز عانا بولعان ەكەن.
سوڭعى ءۇش جىلدا قازاقستاندا قۇرىلىس بەلسەندىلىگى 40 پايىزعا ءوسىپ، وتكەن جىلدىڭ سوڭىندا ادام باسىنا 0,59 شارشى مەتردى قۇرادى. ەگەر وسى بەلسەندىلىك ساقتالىپ قالسا، جىلىنا ادام باسىنا 1 شارشى مەتر كورسەتكىشكە 2020 -جىلعا قاراي قول جەتكىزۋگە بولادى.
2017 -جىلدىڭ قاڭتار- شىلدەسىندە 6,2 ميلليون شارشى مەتر تۇرعىن ءۇي پايدالانۋعا بەرىلدى. قۇرىلىس بەلسەندىلىگى ءوسىمىن قولداۋ ءۇشىن جىل سوڭىنا دەيىن كەم دەگەندە 6 ميلليون شارشى مەتر باسپانا پايدالانۋعا بەرىلۋى ءتيىس. وعان جەتۋ ءۇشىن ەڭ الدىمەن اۋىلدى جەرلەردەگى قۇرىلىستى جانداندىرۋ ماڭىزدى، قازىر اۋىلدارداعى كورسەتكىش قالامەن سالىستىرعاندا 2 ەسە از نەمەسە جىلىنا ادام باسىنا 0,37 شارشى مەتردەن عانا كەلەدى.
الداعى جىلدارى وسى قارقىن ساقتالعان جاعدايدا اۋىل 2024 -جىلى بار بولعانى ادام باسىنا 1 شارشى مەتر كورسەتكىشكە جەتەدى ەكەن.
حالىقتى باسپانامەن قامتاماسىز ەتۋدىڭ ماڭىزدى قۇرالى رەتىندە تۇرعىن ءۇي قۇرىلىسىنا جەكە ينۆەستيتسيا تارتۋ مەن مەملەكەتتىك- جەكەمەنشىك سەرىكتەستىكتى ىنتالاندىرۋ شارالارىن اتاۋعا بولادى. دەگەنمەن 2017 -جىلدىڭ قاڭتار- شىلدەسىندە تۇرعىن ءۇي قۇرىلىسىنداعى جەكە ينۆەستيتسيا وتكەن جىلدىڭ سايكەس كەزەڭىمەن سالىستىرعاندا 6 پايىزعا نەمەسە 22 ملرد تەڭگەگە قىسقارىپ، 352 ميلليارد تەڭگەنى قۇرادى. ال بيۋدجەتتىك ينۆەستيتسيا 95 پايىزعا ۇلعايىپ، 73 ميلليارد تەڭگەگە جەتتى.
Baq.kz