الەۋمەتتىك ماڭىزى بار ازىق- تۇلىك تاۋارلارى 2,4 پايىزعا قىمباتتادى
«23-اقپانداعى جاعداي بويىنشا الەۋمەتتىك ماڭىزى بار ازىق- تۇلىك تاۋارلارى باعالارىنىڭ ءوسۋى 2,4 پايىز دەڭگەيىندە تىركەلدى. بارىنەن بۇرىن يمپورتقا تاۋەلدى ونىمدەردىڭ، جوعارى ەكسپورتتىق سۇرانىسى بار تاۋارلاردىڭ، سونداي- اق ماۋسىمارالىق كەزەڭدە ءداستۇرلى تۇردە قىمباتتايتىن كوكونىستەردىڭ باعالارى ءوسىم كورسەتتى. ولاردىڭ جالپى وسىمگە قوسقان ۇلەسى 2 پايىزدىق تارماقتى قۇرادى»، - دەدى اگروونەركاسىپتىك كەشەندى دامىتۋدىڭ نەگىزگى باعىتتارى جانە ينۆەستيتسيالىق جوبالاردىڭ ىسكە اسىرىلۋى تۋرالى بايانداعان باقىت سۇلتانوۆ.
ونىڭ اتاپ وتۋىنشە، ازىق- تۇلىك تاۋارلارىنىڭ باعاسى ءوندىرىس پەن تۇتىنۋ تەڭگەرىمىنە عانا ەمەس، سونداي- اق يمپورتتالاتىن جانە ەكسپورتقا جىبەرىلەتىن ءونىمنىڭ ۇلەسىنە دە بايلانىستى. مۇنداي اعىندار سىرتقى نارىقتاردىڭ باعالارىن ىشكى ساۋداعا دا اسەر ەتكىزەدى.
«اۋىل شارۋاشىلىعى مينيسترلىگى وڭىرلىك اتقارۋشى ورگاندارمەن بىرلەسىپ، يمپورتقا تاۋەلدى تاۋارلار بويىنشا عانا ەمەس، سونداي- اق ەكسپورتتىڭ جوعارى ۇلەسى بايقالاتىن ونىمدەر بويىنشا دا ءوندىرىستى بارىنشا ۇلعايتۋى قاجەت»، دەدى مينيستر.