الماتىدا مەيرامحانالار مەن ءدامحانالار تابىستارىن 2 ەسەدەن 15 ەسەگە دەيىن كەمىتىپ كورسەتەدى - الماتى مەملەكەتتىك كىرىستەر دەپارتامەنتى

بۇل تۋرالى الماتى قالاسى بويىنشا مەملەكەتتىك كىرىستەر دەپارتامەنتى مەن قوعامدىق تاماقتاندىرۋ سالاسى وكىلدەرىنىڭ كەزدەسۋى بارىسىندا ءمالىم بولدى.
اتالمىش دەپارتامەنتتىڭ باسپا ءسوز قىزمەتىنىڭ حابارلاۋىنشا، كەزدەسۋ بارىسىندا حرونومەتراجدىق زەرتتەۋلەردىڭ ناتيجەلەرى جاريا ەتىلىپ، سالىق سالۋعا بايلانىستى زاڭ بۇزۋشىلىقتارعا جول بەرىلۋگە بولمايتىندىعى اتاپ وتىلگەن.
«قوعامدىق تاماقتاندىرۋ سالاسىندا كىرىستەردى 2 ەسەدەن 15 ەسەگە دەيىن كەمىتىپ كورسەتۋ جانە جۇمىسكەرلەردىڭ سانىن جاسىرۋ (2 ەسەدەن 10 ەسەگە دەيىن) كەڭ تاراعان. سونىمەن قاتار، الكوگولدى ونىمدەرگە قاتىستى ليسەنزيانىڭ جانە جولداما جۇك قۇجاتتاردىڭ جوقتىعى، سالىق ەسەبىنىڭ جۇرگىزىلمەيتىندىگى سەكىلدى فاكتىلەر انىقتالدى»، دەلىنگەن حابارلامادا.
مىسالى، بەلگىلى مەيرامحانالاردىڭ بىرىندە حرونومەتراجدىق زەرتتەۋ جۇرگىزۋ بارىسىندا كىرىستەردى كەمىتىپ كورسەتۋ دەرەگى تىركەلدى. ەگەر زەرتتەۋگە دەيىن ورتاشا كۇندىك ءتۇسىم 31,8 مىڭ تەڭگەنى قۇراسا، حرونومەتراجدى زەرتتەۋ بارىسىندا ءبىر كۇندە تۇسەتىن كىرىستىڭ كولەمى 183,2 مىڭ تەڭگەنى قۇراعاندىعى بەلگىلى بولدى. ياعني، ءبىر جىل ىشىندە ەسەپكە الىنباعان تابىستىڭ كولەمى 50 ميلليون تەڭگەنى قۇرايدى دەگەن ءسوز. ال جالدامالى جۇمىسكەرلەردىڭ سانى 2 ەسە ازايتىلىپ كورسەتىلگەن.
تاعى ءبىر مەكەمەدە ورتاشا كۇندىك ءتۇسىم 195 مىڭ تەڭگە بولعاندىعى انىقتالدى. ال مۇندا كۇن سايىن قولما- قول ەسەپ ايىرىسۋ بويىنشا 3-5 مىڭ تەڭگەگە عانا چەك وتكىزىلگەن. ياعني، كىرىس 15 ەسەدەن اسا كەمىتىلگەن. ال جىلدىق اينالىم 70 ميلليون تەڭگەگە كەمىتىلگەن. ودان باسقا، جالدامالى جۇمىسكەرلەردىڭ سانى 10 ەسە ازايتىلىپ كورسەتىلگەن. مۇندا شىن مانىندە 34 ادام جۇمىس ىستەيتىن بولسا، ەسەپتەمەگە تەك 3 ادام عانا جازىلعان.
تاعى ءبىر جوعارى ساناتتى مەيرامحانادا تابىستاردىڭ 5 ەسە دەگەن ازايتىلاتىندىعى انىقتالدى. ەگەر حرونومەتراجدىق زەرتتەۋگە دەيىن كۇن سايىن تۇسەتىن تابىستىڭ كولەمى 75,5 مىڭ تەڭگەنى قۇراسا، تەكسەرۋ بارىسىندا بۇل سوما كۇنىنە تاعى 400 مىڭ تەڭگەگە ۇلعايعان. ياعني، ەسەپكە الىنباعان كىرىستىڭ جىلدىق كولەمى 115 ميلليون تەڭگەنى قۇراعان. سونداي- اق، جالدامالى جۇمىسكەرلەردىڭ سانى 2 ەسەگە ازايتىلىپ كورسەتىلگەن (16 ادامنان 8 ادامعا دەيىن) . ودان باسقا، 731 مىڭ تەڭگەگە جۇك قۇجاتسىز ساتىپ الىنعان الكوگولدىك ونىمدەر انىقتالدى.
سونىمەن قاتار، كەزدەسۋگە باقىلاۋ- كاسسالىق ماشينالار بويىنشا تەحنيكالىق قىزمەت كورسەتۋ ورتالىقتارىنىڭ قىزمەتكەرلەرى قاتىسىپ، دەرەكتەردى تابىستاۋ فۋنكتسياسى بار باقىلاۋ- كاسالىق اپپاراتتاردى تىركەۋ جانە قولدانۋ ەرەجەسىن ءتۇسىندىردى.
ايتا كەتەلىك، الكوگولدىك ونىمدەر، ديزەلدىك وتىن جانە بەنزين ساتۋشىلار ۇستىمىزدەگى جىلدىڭ 1 - شىلدەسىنەن باستاپ دەرەكتەردى تابىستاۋ فۋنكتسياسى بار باقىلاۋ- كاسسالىق ماشينالاردى قولدانۋعا مىندەتتى.
اۆتور: جاپپاربەرگەن ايبوتا