قازاقستاندا 1 ميلليوننان استام ادام كريپتوۆاليۋتا ساۋداسىمەن اينالىسادى

None
استانا. قازاقپارات - 1 ميلليوننان استام قازاقستاندىق حالىقارالىق كريپتوۆاليۋتا بيرجالارىندا تىركەلگەن. بۇل تۋرالى سەناتتىڭ جالپى وتىرىسىندا دەپۋتات سەرگەي كارپليۋك ايتتى، دەپ حابارلايدى قازاقپارات ءتىلشىسى.

قازىرگى كەزدە سيفرلىق اكتيۆتەر مەن ماينينگ سالاسى وتە جوعارى قارقىنمەن دامىپ كەلە جاتقانىنا توقتالعان سەناتور: «بەيرەسمي دەرەكتەرگە سايكەس، ءبىر ميلليوننان استام قازاقستاندىق حالىقارالىق كريپتوۆاليۋتا بيرجالارىندا تىركەلىپ، كريپتوۆاليۋتا ساۋداسىنا قاتىسىپ وتىر»، - دەدى.

ونىڭ ايتۋىنشا، كريپتوۆاليۋتاعا قاتىستى جۇرگىزىلەتىن وپەراتسيالاردىڭ بارلىعى «كولەڭكەدە» قالىپ وتىر، ياعني قازاقستاننىڭ قۇقىقتىق الاڭىنان تىس.

«وسى ورايدا كريپتوۆاليۋتا نارىعىنىڭ اشىقتىعى مەن قاۋىپسىزدىگىن ەنگىزۋ اياسىندا «استانا» حالىقارالىق قارجى ورتالىعىنىڭ پلاتفورماسىندا كريپتوۆاليۋتالاردى ساتۋ جانە ساتىپ الۋ بويىنشا كەلىسىمدەردىڭ قۇقىقتىق شارتتارىن قامتاماسىز ەتۋ ۇسىنىلىپ وتىر. بۇگىنگى كۇنى سيفرلىق ماينينگ جوعارى تابىستى قىزمەت رەتىندە تانىلدى. دەگەنمەن، قازىرگى ۋاقىتتا قازاقستاندىق ماينەرلەر وزدەرىنىڭ كۇشىن شەتەلدىك پۋلدارعا بىرىكتىرىپ كەلدى. وسىعان بايلانىستى ۋاكىلەتتى ورگاندار سيفرلىق ماينەرلەردىڭ ناقتى كىرىسىن جاريالاي المايدى. اتاپ ايتقاندا، بۇگىن سەناتتا قارالعان زاڭ اياسىندا ءتيىستى نورمالار قاراستىرىلىپ، سيفرلىق ماينينگتى جۇزەگە اسىرۋ تەك تىركەلگەن پۋلدار ارقىلى مۇمكىن بولادى. بۇل رەتتە سيفرلىق ماينينگتى اككرەديتتەۋ قازاقستاندىق ماينەرلەردىڭ ناقتى كىرىستەرىن تولىق جاريالاۋعا جانە ولارعا سالىق سالۋ نورمالارىن قولدانۋعا مۇمكىندىك بەرەدى»، - دەدى سەناتور.

بۇدان بۇرىن حابارلانعانداي، بۇگىن سەناتتىڭ جالپى وتىرىسىندا «قازاقستان رەسپۋبليكاسىنداعى سيفرلىق اكتيۆتەر تۋرالى» زاڭى مەن ىلەسپە قۇجاتتار قارالدى.

سەناتورلار تالقىلانعان زاڭداردى كونتسەپتۋالدى تۇردە قولدايتىندارىن ءبىلدىردى. الايدا، ولاردى قاراۋ بارىسىندا دەپۋتاتتار جەكەلەگەن باپتارعا ءبىرقاتار وزگەرىس ەنگىزدى. وسىعان وراي زاڭداردى سەناتورلاردىڭ ۇسىنىستارىمەن ماجىلىسكە قايتارۋ تۋرالى شەشىم قابىلداندى.

زاڭداردىڭ ماقساتى - سيفرلىق ماينينگتى قۇقىقتىق رەتتەۋ ماسەلەلەرىن شەشۋ. سونىڭ اياسىندا اتالعان قۇجاتتار ەلىمىزدە سيفرلىق اكتيۆتەردى شىعارۋعا جانە ولاردىڭ اينالىمىنا، سيفرلىق ماينينگ جونىندەگى قىزمەتتى دامىتۋعا قاجەتتى قۇقىقتىق بازا قۇرۋدى كوزدەيدى. سول ارقىلى زاڭدار سيفرلىق اكتيۆتەردىڭ زاڭدى نارىعىن قالىپتاستىرۋعا، وسى سالاعا شەتەلدىك ينۆەستيتسيالاردى تارتۋعا جانە قازاقستان ەكونوميكاسىن دامىتۋعا ىقپال ەتپەك.


سوڭعى جاڭالىقتار