ۇكىمەت باسشىسى دەلدالداردىڭ كوميسسيالارى مەن تاريفتەرىنە قاتىستى ماسەلەنى شەشۋگە 1 اي ۋاقىت بەردى
«پرەزيدەنت شاعىن بيزنەس سۋبەكتىلەرىنىڭ مۇددەلەرىن قورعاۋعا باسىمدىق بەرە وتىرىپ، «اتامەكەن» پالاتاسىنىڭ جۇمىسىن قايتا قاراۋدى تاپسىردى. بۇل باعىتتا ءتيىستى جۇمىستار ءجۇرىپ جاتىر. «اتامەكەن» كاسىپكەرلەر پالاتاسىنىڭ بيزنەسپەن اراداعى جان- جاقتى جانە ءوزارا ءتيىمدى بايلانىسىن پرەزيدەنت بەلگىلەپ بەرگەن فورماتتا قامتاماسىز ەتۋ كەرەك»، - دەدى پرەمەر-مينيستر. سونىمەن قاتار ءاليحان سمايىلوۆ مەملەكەت باسشىسى ءتۇرلى مونوپوليست وپەراتورلار مەن دەلدالدار الىپ وتىرعان كوميسسيالار مەن تاريفتەرگە مۇقيات تالداۋ جۇرگىزىپ، ولاردى قايتا قاراۋ نەمەسە الىپ تاستاۋ بويىنشا شەشىمدەر دايىنداۋدى تاپسىرعانىن اتاپ ءوتتى.
«وسىعان بايلانىستى ۇلتتىق ەكونوميكا مينيسترلىگى باسەكەلەستىكتى قورعاۋ اگەنتتىگىمەن جانە «اتامەكەن» پالاتاسىمەن بىرلەسىپ، ءبىر اي مەرزىمدە ۇكىمەتكە تالداۋ قورىتىندىسى مەن وسى ماسەلەنى شەشۋ بويىنشا ناقتى ۇسىنىستار ەنگىزسىن»، - دەدى ۇكىمەت باسشىسى.
