قازاقستاندا 1 ميلليون استام ادامنىڭ جالاقىسى وسەدى - بەردىبەك ساپاربايەۆ

 ۇكىمەتتىك جۇمىس توبى قۇرامىندا ب ق و- عا كەلگەن ق ر ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆ وسىلاي ايتتى، دەپ حابارلايدى قازاقپارات ءتىلشىسى.

ونىڭ ايتۋىنشا، ەلباسى تاپسىرماسىنا سايكەس قولعا الىنىپ جاتقان الەۋمەتتىك سيپاتتاعى باعدارلامالار حالىقتىڭ ءال- اۋحاتىن، تۇرمىسىن جاقسارتۋعا ارنالىپ وتىر.

 وسى ورايدا ەڭ ءبىرىنشى ماسەلە جالاقى ەكەنى بەلگىلى. بيىلعى 1-  شىلدەدەن باستاپ بيۋدجەتتىك مەكەمەدە جۇمىس جاسايتىنداردىڭ، سونىڭ ىشىندە ەڭ تومەنگى جالاقى الاتىنداردىڭ ەڭبەكاقىسى ورتا ەسەپپەن 15 تەن 30 پايىزعا دەيىن وسەدى.

كەم دەگەندە، 1 ميلليون استام قازاقستاندىقتاردىڭ جالاقىسى كوبەيەدى. بۇل نەگىزىنەن ءبىلىم، دەنساۋلىق ساقتاۋ، مادەنيەت، سپورت، الەۋمەتتىك قورعاۋ سىندى سالالاردا جۇمىس جاسايتىنداردى قامتيدى. اتاپ ايتقاندا، بۇعان ادىستەمەشىلەر، تاربيەشىلەر، پسيحولوگتار، سانيتارلار، مەدبيكەلەر جانە باسقا قىزمەتكەرلەر كىرەدى.

سلەسار، سانتەحنيك، ەلەكتر مونتەرلەر دە تىس قالمايدى. ولاردىڭ جالاقىسى ورتا ەسەپپەن 25 پايىزعا وسەدى. وعان قوسا اۋىلدار مەن قالالاردا اكىمشىلىكتەردە جۇمىس جاسايتىن، حالىقپەن تىكەلەي بايلانىستا بولاتىن قىزمەتكەرلەردىڭ ەڭبەكاقىسى دا كوتەرىلەدى. بۇلار بولجام بويىنشا 75 مىڭداي ادام.

 «كوپ بالالى، از قامتىلعان وتباسىلارعا كومەك ەرەكشە نازاردا. كەيىنگى كەزدە ءجيى كوتەرىلىپ جۇرگەن ماسەلە اتاۋلى الەۋمەتتىك كومەك الۋ ءۇشىن تابىس مولشەرى بولاتىن. بيىلعى 1 - ساۋىرگە دەيىن 50 پايىز بولسا، ەندى بۇل 70 پايىز بولماق. ياعني بۇعان دەيىن 14849 تەڭگە بولسا، 1 - ساۋىردەن باستاپ 20789 تەڭگەگە جەتەدى. بىلايشا ايتقاندا، رەسپۋبليكا بويىنشا اتاۋلى الەۋمەتتىك كومەك الۋشىلار سانى 830 مىڭنان اسسا، باتىس قازاقستان وبلىسىندا 24481 ادام بۇعان قول جەتكىزبەك. ءبىزدىڭ مىندەتىمىز - وسى وزگەرىستەردى ەسكەرە وتىرىپ، جۇمىستىڭ ءبارىن 1- ساۋىرگە دەيىن ءبىتىرۋ. سونىمەن قاتار ەلىمىزدە ءار وتباسىنىڭ الەۋمەتتىك كارتاسى جاسالاتىن بولادى» ، دەدى مينيستر.