بيىل الاكولدە 1 ميلليوننان استام ادام دەمالدى
ق ر مادەنيەت جانە سپورت ءمينيسترى ارىستانبەك مۇحامەدي ۇلى ماۋسىمدىق دەمالىس ورىندارىنىڭ ءبىرى رەتىندە الاكولدىڭ اتى ەل ىشىمەن بىرگە، سىرتىندا دا زور تانىمالدىلىققا يە بولىپ كەلە جاتقاندىعىن ايتتى.
«بيىلعى جىلدىڭ ماۋسىمىن قازاقستاندىق عارىشكەر، قازاقستاننىڭ جانە رەسەيدىڭ حالىق باتىرى، ق ر اۆياتسيا گەنەرال-لەيتەنانتى، سەناتور تالعات مۇسابايەۆ، ك س ر و ۇشقىشى ءارى عارىشكەرى، كەڭەس وداعىنىڭ باتىرى اناتولي ارتسەبارسكي، ر ف باتىرى، قازاقستاننىڭ حالىق باتىرى، ۇشقىش ءارى عارىشكەر يۋري مالەنچەنكو مەن ر ف باتىرى، زاڭ عىلىمدارىنىڭ دوكتورى، پروفەسسور يۋري باتۋرين اشقان بولاتىن. عارىشكەرلەردىڭ ارنايى كەلۋى ايگىلى الاكول سۋىنىڭ ەمدىك قاسيەتىن الەم حالقىنىڭ ەسىنە سالدى. ءوز زامانىندا كەڭەستىك عارىشكەرلەر عارىش رادياتسياسىنان تازارۋ ءۇشىن الاكولدىڭ سۋىنا ءتۇسىپ، عارىشقا ۇشىپ كەلگەننەن كەيىن مەديتسينالىق وڭالتۋدان وتكەن بولاتىن»، - دەپ جازادى ارىستانبەك مۇحامەدي ۇلى فەيسبۋك پاراقشاسىندا.
مينيستر اتاپ وتكەندەي، وسىنىڭ ارقاسىندا الاكولگە كەلىپ دەمالۋشىلاردىڭ سانى بيىل ەداۋىر ارتقان.
«الاكولدەگى تۋريستىك ءدۇمپۋ بيىل تۋريستەردىڭ سانىن 30 پايىزعا ارتتىرىپ، كەلۋشىلەردىڭ سانى 1 ميلليون ادامنان استى. ولاردىڭ 120 مىڭى رەسەيدەن كەلگەن»، - دەپ جازادى ارىستانبەك مۇحامەدي ۇلى.
ەسكە سالا كەتسەك، وتكەن جىلى الاكولدە 750 مىڭ ادام دەمالعانىن حابارلاعان بولاتىنبىز.