بيىل ۇزدىك رومانعا 1 ميلليون تەڭگە تاعايىندالىپ وتىر - «التىن قالام» بايقاۋى
الماتى. قازاقپارات - «التىن قالام» ادەبي جۇلدەسىنىڭ 7- ماۋسىمى باستالدى، دەپ حابارلايدى قازاقپارات ءتىلشىسى.
بۇگىن الماتىدا «قازاقستان» باسپا ءسوز كلۋبىندا «التىن قالام» ادەبي جۇلدەسىن ۇيىمداستىرۋشىلار جاڭا ماۋسىمنىڭ باستالعانىن، بۇگىننەن باستاپ، بايقاۋعا شىعارمالار قابىلداناتىنىن جاريا ەتتى. ۇيىمداستىرۋشىلاردىڭ ءبىرى، جۋرناليست كەنجە جۇمان ۇلىنىڭ ايتۋىنشا، بيىل ەسەنقۇل مامان ۇلى اتىنداعى باس جۇلدەگە 1 ميلليون تەڭگە تىگىلىپ وتىر. اتالعان جۇلدە قازاق تىلىندەگى ۇزدىك رومان اۆتورىنا بۇيىرماق. سونىمەن قاتار، بالالار ادەبيەتىنە ارنالعان «دارابوز» بايقاۋىنىڭ جەڭىمپازىنا دا 1 ميلليون تەڭگە جۇلدە بەرىلمەك.
«بايقاۋدى بيىل 7- رەت ۇيىمداستىرىپ وتىرمىز. بۇگىننەن باستاپ، قىركۇيەكتىڭ 15-ىنە دەيىن شىعارمالاردى قابىلدايمىز. وقىرماندار تاراپىنان داۋىس بەرۋ، ۇزدىك شىعارمانى انىقتاۋ 15-30 - قىركۇيەك ارالىعىندا بولادى. وسى 6-اي ىشىندە رەسپۋبليكانىڭ بارلىق وڭىرىنەن جىبەرىلگەن قازاق- ورىس تىلدەرىندەگى شىعارمالاردى قابىلداۋدى باستاعالى وتىرمىز. جاقىندا ءبىز زەرتتەۋ جۇرگىزىپ، فانتاستيكا، دەتەكتيۆ جانرلارىنا سۇرانىس ۇلكەن ەكەنىن بىلدىك. سوندىقتان، وسى جانرلار بويىنشا نوميناتسيانى قالدىردىق. بيىل ەسەنقۇل مامانوۆ اتىنداعى جۇلدەنى جاريالاپ، وعان 1 ميلليون تەڭگە تاعايىنداپ وتىرمىز. «دارابوز» بايقاۋى بۇعان دەيىن 11 رەت وتكىزىلگەنىن بىلەسىزدەر. بىلتىردان باستاپ اتالعان بايقاۋ «التىن قالام» بايقاۋى اياسىندا وتە باستادى. وسى بايقاۋعا دا 1 ميلليون تەڭگە تاعايىنداپ، ۇزدىك بالالار تۋىندىسىن ماراپاتتاماقپىز. جۇلدەلەردى «جەر سۋ» كورپوراتسياسى بەرگەلى وتىر»، - دەدى كەنجە جۇمان ۇلى.
«التىن قالام» بايقاۋى بويىنشا بيىل دا وقىرماندار akalam.kz سايتىندا داۋىس بەرە الادى. داۋىس بەرۋ «جىلدىڭ ۇزدىك پوەزياسى»، «جىلدىڭ ۇزدىك پروزاسى»، «دارابوز» بالالار جانە جاس وسپىرىمدەردىڭ ۇزدىك شىعارماسى، «ەسەنجول دومبايەۆ اتىنداعى جىلدىڭ ۇزدىك ساتيراسى»، «جىلدىڭ ۇزدىك فانتاستيكا جانە دەتەكتيۆ شىعارماسى»، «جىلدىڭ ۇزدىك كينوسسەناريى جانە دراماتۋرگياسى»، «قازاق ادەبيەتىنە ەلەۋلى ەڭبەگى ءۇشىن» جانە «ەسەنقۇل مامانوۆ اتىنداعى سىيلىق» نوميناتسيالارى بويىنشا جۇرەدى. قالامگەرلەر شىعارمالارىن adebiet2014@gmail.com ەلەكتروندى پوشتاسىنا 15 - قىركۇيەككە دەيىن جولداي الادى.
ايتا كەتەيىك، «التىن قالام» بايقاۋىنىڭ 2017 -جىلعى ماۋسىمىندا اقىن- جازۋشىلاردان مىڭنان استام شىعارما قابىلدانعان. ۇيىمداستىرۋشىلار مۇنى رەكوردتىق كورسەتكىش دەپ جاريالاعان بولاتىن.
اۆتور: الماس مۇقاش ۇلى
