قازاقستان ۆوكزالدارىندا 1- ماۋسىمنان باستاپ جولاۋشىلاردىڭ جۇكتەرى تەكسەرىلەدى
بۇل تۋرالى ق ر ينۆەستيتسيالار جانە دامۋ مينيسترلىگىنىڭ رەسمي وكىلى مۇرات جۇمانباي فەيسبۋكتەگى پاراقشاسىندا جاريالادى، دەپ حابارلايدى قازاقپارات.
«جولاۋشىلاردىڭ قاۋىپسىزدىگىن ارتتىرۋ ماقساتىندا 2017-جىلدىڭ اقپان ايىنان باستاپ ەلىمىزدىڭ بارلىق تەمىرجول ۆوكزالدارىندا قول جۇكتەرى مەن باگاجدارىن تەكسەرۋ جۇمىستارى كەزەڭ-كەزەڭىمەن ەنگىزىلۋدە.
بيىل 1- اقپاننان باستاپ الماتى-1 جانە الماتى-2 ۆوكزالدارىندا تەكسەرۋ ەنگىزىلدى. ال 1- ساۋىردەن باستاپ استانا قالاسى ۆوكزالىندا تەكسەرۋ ۇيىمداستىرىلدى. قالعان 15 ۆوكزالدا (قاراعاندى، اقتوبە، كوكشەتاۋ، قوستاناي، ورال، قىزىلوردا، ماڭعىشلاق، اتىراۋ، جامبىل، شىمكەنت، بەينەۋ، شۋ، سەمەي، پەتروپاۆل، پاۆلودار) تەكسەرۋ 2017-جىلدىڭ 1- ماۋسىمىنان ەنگىزىلەدى»، - دەپ جازدى رەسمي وكىل.
سونىمەن قاتار ول ەلوردادا جاڭادان پايدالانۋعا بەرىلەتىن «استانا - نۇرلى جول» ۆوكزالىندا دا وسىنداي قاۋىپسىزدىك شارالارى قاراستىرىلعانىن اتاپ ءوتتى.
«2014-جىلعى 16- قازانداعى ق ر ۇكىمەتىنىڭ قاۋلىسىمەن بەكىتىلگەن قاعيدالارعا سايكەس، تەرروريستىك قاۋىپتىلىكتىڭ قانداي دا ءبىر قاۋىپ دەڭگەيى جاريالانباعاندا نە قاۋىپتىڭ ءبىرقالىپتى («سارى») دەڭگەيى جاريالانعان جاعدايدا جولاۋشىلاردى جانە كەلۋشىلەردى، ولاردىڭ الىپ جۇرەتىن زاتتارىن، ونىڭ ىشىندە قول جۇگى مەن باگاجىن ءىشىنارا تەكسەرىپ، قاراۋ جۇرگىزىلەدى.
ءىشىنارا تەكسەرىپ، قاراۋ قاعيداتى كولىك ينفراقۇرىلىمى وبەكتىلەرىندە تەكسەرىپ، قاراۋ پۋنكتى قىزمەتكەرلەرىنىڭ كۇدىگىن تۋدىراتىن جولاۋشىلار مەن كەلۋشىلەرگە، ولاردىڭ الىپ جۇرەتىن زاتتارىنا، ونىڭ ىشىندە قول جۇگى مەن باگاجىنا قولدانىلادى. قاۋىپتىڭ جوعارى («قىزعىلت سارى») جانە شەكتى («قىزىل») دەڭگەيى جاريالانعان كەزدە بارلىق جولاۋشىلار مەن كەلۋشىلەر، ولاردىڭ الىپ جۇرەتىن زاتتارى، ونىڭ ىشىندە قول جۇگى مەن باگاجى تەكسەرىپ، قاراۋعا جاتادى»، - دەيدى م. جۇمانباي.
