قىتايدا جانارمايسىز جۇرەتىن كولىكتەر سانى 1 ميلليونان اسادى

استانا. قازاقپارات - قىتاي 2020 -جىلعا دەيىن «جاسىل» ەنەرگەتيكا سالاسىنا 360 ميلليارد دوللار ينۆەستيتسيا سالۋدى جوسپارلاپ وتىر. وسىلايشا كومىر ءوندىرۋ مەن پايدالانۋدى بىرتىندەپ ازايتا بەرمەك.

 ال ەنەرگەتيكا سالاسىندا 13 ميلليون جاڭا جۇمىس ورنىن اشپاق. وسى رەتتە ەلەكتروموبيل ءوندىرىسىن جانداندىرۋ ءۇشىن اۋقىمدى جوسپار قۇرىلدى.

 قىتايدا جاڭا قۋات كوزدەرىمەن قوزعالاتىن اۆتوكولىك 2020 - جىلعا قاراي ءتورت ەسە ارتادى. قىتاي الداعى ءۇش جىلدا جاڭا قۋات كوزدەرىمەن قوزعالاتىن اۆتوكولىك ءوندىرۋدى جىلىنا 2 ميلليونعا جەتكىزۋدى جوسپارلاپ وتىر. قازىر بۇل ەلدە جانارمايسىز جۇرەتىن كولىكتەر سانى 1 ميلليونان اسادى. بەيجىڭ سياقتى ءىرى مەگاپوليستەر قورشاعان ورتاعا قالدىق شىعارمايتىن اۆتوبۋستار، ەكوتاكسو پاركتەر سياقتى نارىقتى دامىتىپ جاتىر. ويتكەنى اۋاسى لاستانعان شاھارلار ءۇشىن ەلەكتروموبيلدى جاپپاي قولدانىسقا ەنگىزۋ وتە وزەكتى. بەيجىڭدەگى بۇل ەكو تاكسوپارك «فانشيان» اۋدانىندا قىزمەت كورسەتەدى.

ول 2012 -جىلى جاڭا قۋات كوزدەرىمەن قوزعالاتىن قوعامدىق كولىك قىزمەتىن دامىتۋ باعدارلاماسى نەگىزىندە قۇرىلدى. العاشىندا 100 گە جۋىق تەحنيكا بولسا، قازىر 600-دەن استى.

 لي گان، ەكوتاكسو پاركتىڭ باس مەنەجەرى:

 - ءبىز ەكو تاكسيلەردىڭ سانىن عانا ەمەس، ساپاسىن دا ارتتىرۋعا ءمان بەرىپ كەلەمىز. جىلدان جىلعا تەحنيكالىق جاعىنىنان جەتىلدىرىپ وتىرامىز. ماسەلەن، العاشقى كولىكتەر ۇزاق ۋاقىت قۋاتتالسا، قازىر بار جوعى 2 ساعاتتىڭ ىشىندە باتارەياسى تولادى. كەلەشەكتە ءبىز اككۋمۋلياتورىن اۋىستىرۋعا بولاتىن ەكوتاكسيلەردى قولدانىسقا ەنگىزەمىز. بۇل كولىكتەردىڭ كۇندىز ءتۇنى جۇمىس ىستەۋىنە مۇمكىندىك بەرەدى. جانارمايمەن جۇرەتىن ءجۇز كولىك جىلىنا 600 مىڭ ليتر بەنزين جاعىپ، قورشاعان ورتاعا 6 ميلليون تەكشە مەتر زياندى زاتتار شىعارادى. ال ولاردىڭ ورنىن بولاشاقتى ەلەكتر قۋاتىمەن قوزعالاتىن كولىكتەر باسسا، ەكولوگيانى جاقسارتۋعا ۇلكەن سەپ.

 ۆان ۋەچان، تاكسي جۇرگىزۋشىسى:

- مەنىڭ ەكوتاكسيدى تىزگىندەگەنىمە جارتى جىلداي بولدى. جولاۋشىلار ءۇشىن وتە قولايلى. بىرىنشىدەن باعاسى ارزان. ەكىنشىدەن ەشقانداي ارتىق دىبىسى جوق. توقتىڭ كۇشى 4 ادامدى الىپ جۇرۋگە ابدەن جەتەدى. ەڭ باستىسى قورشاعان ورتانى لاستامايدى.

 قىتاي ۇكىمەتى ەلەكتروموبيل ساتىپ الۋشىلار ءۇشىن ءتۇرلى جەڭىلدىكتەر جاساپ وتىر. مەملەكەتتىك تىركەۋ ءنومىرىن بىردەن بەرەدى. ونەركاسىپ جانە اقپاراتتاندىرۋ ءمينيسترى مياو ۆەيدىڭ ايتۋىنشا 2025 -جىلعا قاراي قىتايدا ساتىلاتىن اۆتوكولىكتەردىڭ 20 پايىزىن جانارمايسىز جۇرەتىن كولىكتەردىڭ ۇلەسى قۇرايدى. مەملەكەت جاڭا قۋات كوزىمەن قوزعالاتىن اۆتوءوندىرىستى جانداندىرۋدى جوسپارلاپ وتىر. وسى باعىتتا ارنايى زەرتتەۋ جۇمىستارىن جۇرگىزەتىن ەلدەگى ەڭ ۇلكەن ورتالىق تا اشىلادى.

www.24.kz