قازاقستان پرەزيدەنتى 1- دارەجەلى سەرگي رادونەجسكي وردەنىمەن ماراپاتتالدى

بۇل تۋرالى اقوردانىڭ باسپا ءسوز قىزمەتىنەن حابارلادى.

كەزدەسۋ بارىسىندا پاتريارح كيريلل نۇرسۇلتان نازاربايەۆتى 1- دارەجەلى سەرگي رادونەجسكي وردەنىمەن ماراپاتتادى.

قازاقستان پرەزيدەنتى ورىس پراۆوسلاۆ شىركەۋىنە ەلىمىزدىڭ كونفەسسياارالىق كەلىسىمدى نىعايتۋعا باعىتتالعان ساياساتىنا جوعارى باعا بەرگەنى ءۇشىن العىس ءبىلدىردى.

«بارلىق تاۋەلسىزدىك جىلدارى ءبىز ۇنەمى قاتىناس تەڭدىگىن، بارلىق ءدىني كونفەسسيالارعا سىيلاستىقتى قولدادىق. ارينە، قازاقستاندا نەگىزگى ءدىن يسلام مەن پراۆوسلاۆيە بولىپ تابىلادى. بۇل رۋحاني الەمنىڭ ەكى دىڭگەگىن - قوعامىمىزداعى كەلىسىمنىڭ نەگىزى دەسە بولادى. قازىر الەمدە ءدىني جانە ەتنيكالىق نەگىزدە ءتۇرلى قاقتىعىستار ءجۇرىپ جاتقانىن جاقسى بىلەمىز. سوندىقتان ارامىزداعى تۇراقتىلىق پەن تۇسىنىستىكتى ماقتان ەتۋىمىز قاجەت. سونداي-اق قازاقستاندا الەمدىك جانە ءداستۇرلى ءدىن كوشباسشىلارىنىڭ سەزى وتەدى»، - دەدى مەملەكەت باسشىسى.

نۇرسۇلتان نازاربايەۆ ورىس پراۆوسلاۆ شىركەۋى قازاقستان مەن رەسەي اراسىنداعى دوستىق قاتىناستاردى دامىتۋعا ۇلەس قوسقانىن اتاپ ءوتتى.

ءوز كەزەگىندە، پاتريارح كيريلل رەسپۋبليكامىزدىڭ بىرەگەي تاجىريبەسى باسقا ەلدەرگە، اسىرەسە عالامشاردىڭ ءار نۇكتەسىندە قاقتىعىس ورىن العان ەلدەرگە ۇلگى بولۋى ءتيىس ەكەنىن باسا ايتتى.

«ءسىز - الەم تانىعان، كورنەكتى مەملەكەت قايراتكەرىسىز. ءسىزدىڭ باسشىلىعىڭىزبەن قازاقستان قىسقا مەرزىمدە قۋاتتى دامۋ جولىنا ءتۇستى. كوپەتنيكالىق مەملەكەت رەتىندە قازاقستان - ءتۇرلى ەتنوس پەن ءدىن توكىلدەرى بەيبىت قارىم-قاتىناس ورناتۋ جاعىنان الەمگە ۇلگى دەسە بولادى»، - دەدى ماسكەۋ جانە بۇكىل رۋس پاتريارحى كيريلل.