قازاقستان ارۋى جۇلدەسىنىڭ 1 ميلليون تەڭگەسىن قايىرىمدىلىققا بەرمەك

استانا. قازاقپارات - «قازاقستان ارۋى-2015» اتانعان ءاليا مەرگەنبايەۆا بايقاۋدان ۇتقان جۇلدەسىنىڭ ءبىر ميلليون تەڭگەسىن اقتاۋ، استانا جانە الماتى قالالارىنداعى بالالار ۇيىنە اۋدارماق.

بۇل تۋرالى 17 جاستاعى بويجەتكەن تۋعان ولكەسى اقتاۋدا ب ا ق وكىلدەرىنە بەرگەن سۇحباتىندا ايتتى، دەپ جازادى Lada.kz.

جاس بويجەتكەندى مۇنداي شەشىمگە يتەرمەلەگەن اناسى ەكەن. بايقاۋدان سوڭ، ءاليا ۇتىپ العان اقشانى اتا- اناسىنا بەرەتىنىن ايتقان ەدى.

«الماتى، استانا جانە اقتاۋ قالالارىندا ءۇش بىردەي قايىرىمدىلىق اكسيالارىن وتكىزەمىز»، - دەيدى مودەلدىك اگەنتتىكتىڭ ديرەكتورى تاتيانا كوروبەينيكوۆا.

الەۋمەتتىك جەلىدە قىزۋ تالقىعا تۇسكەن «كىتاپ وقىمايمىن» دەگەن پىكىرىنە اگەنتتىك ديرەكتورى تاتيانا كوروبەينيكا دا ءوز كوزقاراسىن ءبىلدىردى. ونىڭ پىكىرىنشە، كىتاپ وقىماۋ تەك اقتاۋلىق ارۋدىڭ عانا ەمەس، قازىرگى كەزدەگى جاس وسكىننىڭ بارلىعىنىڭ دا باسىندا بار ماسەلە كورىنەدى.