تۇرىك اقىنى يۋنۋس ەمرەنىڭ ولەڭدەرىن 19 قازاق اقىنى قازاق تىلىنە اۋداردى
2021 -جىل يۋنەسكو جانە تۇركيا رەسپۋبليكاسىنىڭ پرەزيدەنتى رەجەپ تايپ ەردوعان تاراپىنان ومىردەن وزعانىنا 700 جىل تولعان، تۇرىك ءتىلىنىڭ ەڭ كورنەكتى تۇلعالارىنىڭ ءبىرى يۋنۋس ەمرە جانە تۇرىك جىلى بولىپ جاريالاندى. يۋنۋس ەمرە-انادولى جۇرتىندا ياسساۋيدىڭ مەكتەبىن جالعاستىرۋشى اقىن، ولەڭدەرىن ياسساۋي جولىمەن ءتۇسىندىرىپ جازعان. ولەڭدەرىنىڭ يدەياسى ادامزاتتى سۇيۋگە، اقيقاتقا، سابىرعا، ياعني ادامزاتتىق قۇندىلىقتارعا ۇندەيدى. وسى ايتۋلى وقيعاعا وراي يۋنۋس ەمرە تۇرىك مادەنيەت ورتالىعى مەن قازاقستان جازۋشىلار وداعى نۇر-سۇلتان فيليالى «يۋنۋس ەمرەنىڭ تاڭدامالى ولەڭدەرى» اتتى كىتاپتى قازاق تىلىنە اۋدارىپ، كىتاپ ەتىپ باسىپ شىعاردى.
كىتاپ تۇرىك پروفەسسور ەردوعان بوز دايىنداعان ءماتىندى نەگىزگە الا وتىرىپ اۋدارىلدى. اقىننىڭ 13-14-عاسىرلاردا جازعان «ناسيحاتتار كىتابى» جانە «ديۋان» جيناعىنىڭ 72 ولەڭىن ەردوعان بوز قازىرگى تۇرىك تىلىنە ىڭعايلاپ ءماتىن تۇرىندە دايىنداپ شىقتى.
اتالعان ءماتىندى جولما-جول يۋنۋس ەمرە تۇرىك مادەنيەت ورتالىعىنىڭ ديرەكتورىنىڭ مىندەتىن اتقارۋشى الماگۇل يسينا قازاق تىلىنە اۋداردى. ال، 19 قازاق اقىنى وسى ءماتىندى ولەڭگە اينالدىردى. ديۋان جيناعى - يۋنۋستىڭ اقىندىعىنىڭ شىڭى دەپ سانالادى. جارىق كورگەن كىتاپتا قازاقشا اۋدارما مەن 13-14-عاسىرلارداعى تۇرىكشە ءتۇپنۇسقاسى بىرگە ۇسىنىلعان. جازۋشىلار وداعى نۇر-سۇلتان فيليالى ءتوراعاسى داۋلەتكەرەي كاپ ۇلى يۋنۋستىڭ كىتابىنىڭ اۋدارماسىنا بايلانىستى ويلارىن ءبولىستى.
«يۋنۋس ەمرە جىلىنا بايلانىستى تۇركيانىڭ يۋنۋس ەمرە ينستيتۋتى مەن قازاقستان جازۋشىلار وداعى نۇر سۇلتان قالالىق فيليالى بىرلەسىپ، يۋنۋستىڭ 72 ولەڭىن قازاق تىلىنە اۋدارىپ، كىتاپ ەتىپ باسىپ شىعاردى. بۇل جوباعا قازاقستاننىڭ ەڭ تالانتتى 19 جاس اقىن اۋدارماشىسىن قاتىستىردىق. سەبەبى جاڭا اقىندار، جاس اقىندار- قازىرگى ەۆروپانىڭ دا، باتىستىڭ دا، شىعىستىڭ دا ولەڭ ورنەگىن بىلەتىن ىزدەنىمپاز، بۇگىنگى ادەبيەتكە وزىندىك قولتاڭباسىمەن كەلگەن اقىندار. يۋنۋس ەمرە جىرلارىنىڭ اۋدارماسىنا ەرەكشە ورنەك بەرەدى دەپ ويلادىق. قازاق اقىندارىنىڭ ىشىندە يۋنۋستىڭ جىرلارىن ەرتەدەن اۋدارىپ جۇرگەن ايتۋلى شايىرلارىمىزدى نەسىپبەك ايت ۇلى، ۇلىقبەك ەسداۋلەت، وتكەندە عانا يۋنۋستىڭ جىرلارىن جەكە كىتاپ قىلىپ شىعارعان سۆەتقالي نۇرجاندى اتاپ وتۋگە بولادى. بۇل كىسىلەردىڭ اۋدارمالارىنىڭ ورنى بولەك. دەگەنمەن جاستاردىڭ جاڭاشا كوزقاراسىن يۋنۋستىڭ جىرلارىندا تانىعىمىز كەلدى. يۋنۋس ەمرەنىڭ 72 ولەڭىن 13-عاسىرداعى تۇرىك تىلىنەن قازىرگى زامانعى تۇرىك تىلىنە پروفەسسور ەردوعان بوز اۋدارعان. اقىندارعا جۇمىس پروتسەسىندە ولەڭنىڭ ءوزىنىڭ ءتۇپ ماعىناسىنان، قازىعىنان اۋىتقىمايتىنداي ەتىپ اۋدارۋ تۋرالى ۇسىنىس جاسادىق. ءبىزدىڭ 19 اقىنىمىز ولەڭدەردى تاماشا ەتىپ اۋدارىپ بەردى. بۇل - قازاقستان جازۋشىلار وداعىنىڭ نۇر-سۇلتان قالاسى فيليالى مەن يۋنۋس ەمرە ينستيتۋتىنىڭ بىرلەسكەن جوباسى. جالپى تۇركى دۇنيەسىندەگى تۇرىك شايىرلاردىڭ جىرلارى ءاربىر ەلگە ورتاق. سوندىقتان ولار ءبىر - بىرلەرىنە ۇلكەن اسەرىن تيگىزەدى، ءارى حالىقتىڭ شىعارماشىلىعىنا، بۇگىنگى جاستاردىڭ ادەبيەتكە دەگەن جاڭاشا كوزقاراسىنا اسەر ەتەدى. 1000 دانا جارىق كورگەن يۋنۋستىڭ تاڭدامالى ولەڭدەرى جيناعى قازاقستاننىڭ وبلىس ورتالىعىنداعى بارلىق كىتاپحانالار مەن ۋنيۆەرسيتەتتەرگە، اقىندار مەن جازۋشىلارعا تارتۋ ەتىلەدى. كىتاپتىڭ تۇساۋكەسەرى 11-ناۋرىز كۇنى ساعات 15.00-تە نۇر-سۇلتان قالاسىندا ق ر ۇلتتىق اكادەميالىق كىتاپحانادا وتەدى. شاراعا اقىن، جازۋشىلار، زيالى قاۋىم وكىلدەرى، تۇركيانىڭ قازاقستانداعى توتەنشە جانە وكىلەتتى ەلشىسى، ديپلوماتيالىق ميسسيا وكىلدەرى قاتىسادى.