الماتىدا جىل باسىنان بەرى موپەدتەردىڭ قاتىسۋىمەن 199 جول اپاتى بولدى
ۆەدومستۆونىڭ مالىمەتىنشە، الماتىدا بيىل جىل باسىنان بەرى موپەدتەردىڭ قاتىسۋىمەن 199 جول اپاتى بولىپ، سالدارىنان 198 ادام زارداپ شەگىپ، ءبىر ادام قازا تاپتى. ال وتكەن جىلى الماتىدا موپەدتەردىڭ قاتىسۋىمەن 778 جول اپاتى بولىپ، 836 ادام زارداپ شەگىپ، 7 ادام قايتىس بولعان.
الماتى قالالىق پوليتسيا دەپارتامەنتىنىڭ جەرگىلىكتى پوليتسيا قىزمەتى باسقارماسىنىڭ باستىعى ەرجان ۇزابايەۆتىڭ مالىمەتىنشە، قازىرگى تاڭدا ىشكى ىستەر مينيسترلىگىندە موپەدتەردى مەملەكەتتىك تىركەۋگە جاتاتىن كولىك تۇرلەرىنىڭ تىزبەسىنە قوسۋ تۋرالى زاڭناماعا وزگەرتۋلەر ەنگىزۋ ماسەلەسى قاراستىرىلىپ جاتىر.
«كولىكتىڭ بۇل ءتۇرىنىڭ سۇرانىسى قول جەتىمدىلىكپەن، قالا ىشىندە قوزعالۋعا جەڭىلدىگىمەن، سونداي- اق تىركەۋ، وقۋدان ءوتۋ جانە جۇرگىزۋشى كۋالىگىن الۋ قاجەتتىلىگىنىڭ بولماۋىمەن بايلانىستى. كولىكتىڭ بۇل ءتۇرى ايتارلىقتاي جوعارى جىلدامدىق - ساعاتىنا 80 شاقىرىمعا دەيىن جۇرەتىنى بەلگىلى. سوندىقتان ىشكى ىستەر مينيسترلىگى دەڭگەيىندە قوزعالتقىشىنىڭ كولەمى 50 تەكشە سانتيمەتردەن جوعارى موپەدتەردى مەملەكەتتىك تىركەۋگە جاتاتىن كولىك تۇرلەرىنىڭ تىزبەسىنە قوسۋ تۋرالى زاڭناماعا وزگەرتۋلەر ەنگىزۋ ماسەلەسى قاراستىرىلىپ جاتىر. جاس شەكتەۋلەرىن بەلگىلەيتىن زاڭنامالىق نورمالاردىڭ بولماۋىنا بايلانىستى كولىكتىڭ بۇل ءتۇرىن ەرەسەكتەرمەن قاتار بالالار دا پايدالانادى. كوبىنەسە بۇل كولىك تۇرلەرىنىڭ قوزعالىسى جاياۋ جۇرگىنشىلەرگە ارنالعان تروتۋارلار مەن جولداردا بولادى»، - دەدى ەرجان ۇزابايەۆ.
ول سونداي-اق كۋرەرلىك كومپانيالاردىڭ وكىلدەرىن وزدەرىنىڭ كۋرەرلەرى جاسايتىن جول ەرەجەلەرىن بۇزۋ دەرەكتەرىن انىقتاۋ ءۇشىن جەرگىلىكتى ءىس-شاراعا قوسىلۋعا ۇسىنىس جاسالعانىن مالىمدەدى.
«قازىر پيلوتتىق جوبا اياسىندا ءاربىر كۋرەرلىك كومپانياعا ءنومىر بەرۋدى، ونى كۋرەردىڭ مالىمەتتەرى مەن ءجۇرۋ شارتتارى تۋرالى اقپاراتپەن بىرگە جۇمىس بەرۋشىنىڭ دەرەكتەر بازاسىندا تىركەۋ ءۇشىن ءبىرىڭعاي اقپاراتتىق قوردى بىرىكتىرۋدى ۇسىنىپ وتىرمىز. ياعني، «سەرگەك» اقپاراتتىق جۇيەسىندە موبيلدى كولىك جۇرگىزۋشىلەرى جىبەرگەن بۇزۋشىلىقتاردى تىركەۋدىڭ جاڭا تەحنيكالىق مۇمكىندىگى بار. سونىمەن قاتار، جەتكىزۋ قىزمەتىنىڭ وكىلدەرى ءتارتىپ بۇزۋشىلاردى انىقتاپ، ولاردى باقىلاۋ ءۇشىن ءار قىزمەتكەرگە ءنومىر بەرىپ، ونى جارىقپەن شاعىلىساتىن ەلەمەنتپەن بىرگە كونتەينەرلەرگە قويۋلارى قاجەت»، - دەدى سپيكەر.
