قىزىلوردا وبلىسىندا ءىرى قارا، جىلقى جانە تۇيە مالىنىڭ سانى 1990 - جىلدان بەرگى ەڭ جوعارعى كورسەتكىشكە جەتتى

استانا. قازاقپارات - قىزىلوردا وبلىسىندا «سىباعا» باعدارلاماسى اياسىندا اعىمداعى جىلى 2,5 مىڭ باس انالىق سيىر جانە 139 باس اسىل تۇقىمدى ەت باعىتىنداعى بۇقا ساتىپ الۋ جوسپارلانعان.

بۇگىنگى تاڭدا 60 شارۋاشىلىق 410,3 ميلليون تەڭگە نەسيە الىپ، 2517 باس سيىر جانە 141 باس بۇقا ساتىپ الدى. بۇل تۋرالى «سىر مەديا» ج ش س جانىنداعى وبلىستىق كوممۋنيكاتسيا ورتالىعىندا وتكەن بريفينگتە وبلىستىق اۋىلشارۋاشىلىعى باسقارماسىنىڭ باسشىسى باقىت جاحانوۆ حابارلادى.

- «التىن ساقا» باعدارلاماسى بويىنشا ۇستىمىزدەگى جىلى 4 مىڭ باس قوي ساتىپ الۋ جوسپارلانسا، وسىدان بۇگىنگى كۇنى 17 شارۋاشىلىق 117,1 ميلليون تەڭگە نەسيە الىپ، 4698 باس انالىق قوي، 174 باس قوشقار ساتىپ الدى، - دەدى ب. جاحانوۆ. - ال «قۇلان» باعدارلاماسىمەن اعىمداعى جىلى 1 مىڭ باس جىلقى ساتىپ الۋ جوسپارلانىپ، بۇگىنگى تاڭدا 55 شارۋاشىلىق 472,7 ميلليون تەڭگە نەسيە الىپ 1547 باس بيە، 190 باس ايعىر ساتىپ الدى.

ايتا كەتۋ كەرەك، مەملەكەت تاراپىنان تۇراقتى تۇردە كورسەتىلىپ كەلە جاتقان قولداۋدىڭ ارقاسىندا وبلىستا ءىرى قارا، جىلقى جانە تۇيە مالىنىڭ سانى ەڭ جوعارى بولعان 1990 - جىلعى دەڭگەيدەن اسسا، قويدىڭ سانى جاقسى قارقىنمەن ءوسۋ ۇستىندە. وبلىس بويىنشا 2015 -جىلدىڭ 1 - جەلتوقسان وتكەن جىلدىڭ وسى كەزەڭىمەن سالىستىرعاندا ءمۇيىزدى ءىرى قارا 0,6 پايىز، قوي مەن ەشكى 3,5 پايىز، جىلقى 10,7 پايىز، تۇيەنىڭ سانى 5,8 پايىز، قۇستىڭ سانى 3,6 پايىزعا كوبەيدى.