گەرمانيانىڭ سولتۇستىك- باتىسىنداعى نەمىس اسكەرلەرى وداقتاستار الدىندا قارسىلىقسىز تىزە بۇكتى - 1945 - جىلدىڭ 4 - مامىرى

الماتى. قازاقپارات - 1945 - جىلدىڭ 4 -  مامىرىندا - سوعىستىڭ 1413 - كۇنى گەرمانيانىڭ سولتۇستىك- باتىسىنداعى، سونىمەن قاتار شلەزۆيگ- گولشتەين، گوللانديا جانە دانيا جەرىندەگى نەمىس قارۋلى كۇشتەرى وداقتاستاردىڭ 21- ارميالار توبىنىڭ الدىندا قارسىلىقسىز تىزە بۇكتى.

وسى كۇنى 17 ساعات 30 مينۋتتا گەرمانيانىڭ سولتۇستىك- باتىسىنداعى تومەنگى ساكسونيا جەرىندە ورنالاسقان ليۋنەبۋرگ قالاسىنىڭ تۇبىندەگى ۆەنديش- ەفەرن اۋىلى ماڭىندا جاڭادان تاعايىندالعان گەرمانيا اسكەري تەڭىز كۇشتەرىنىڭ قولباسشىسى، فلوت ادميرالى گانس- گەورگ فون فريدەبۋرگ باستاعان نەمىس دەلەگاتسياسى وداقتاستاردىڭ 21- ارميالار توبىنىڭ قولباسشىسى، بريتاندىق فەلدمارشال بەرنارد مونتگومەريدىڭ قاتىسۋىمەن قارسىلىقسىز تىزە بۇگۋ تۋرالى اكتىگە قول قويدى.

ول بويىنشا 5 - مامىر كۇنى تاڭعى ساعات 8:00 دەن باستاپ، گەرمانيانىڭ سولتۇستىك- باتىسىنداعى، گوللانديا جانە دانياداعى بۇكىل نەمىس قارۋلى كۇشتەرى قارۋلارىن تاستايدى.

وسىلايشا، گەرمانيانىڭ ەڭ سولتۇستىك ايماعىنداعى فلەنسبۋرگ قالاسىندا ورنالاسقان، 3 - مامىردا گيتلەردىڭ مۇراگەرى ادميرال كارل دەنيتس قۇرعان گەرمانيانىڭ سوڭعى فاشيستىك ۇكىمەتىنىڭ سوڭعى كۇندەرى باستالدى.

 ال «سوتسياليستىك قازاقستان» گازەتىنىڭ 1945 - جىلدىڭ 6 - مامىرىنداعى (جەكسەنبى) №88- سانىنداعى باسىلعان كەڭەس اقپارات مالىمەتىنە سۇيەنسەك، 4 - مامىردا 1- بەلورۋس مايدانىنىڭ اسكەرلەرى براندەنبۋرگ قالاسىنىڭ وڭتۇستىگىندە شابۋىلداي وتىرىپ، بەلتسيگ، ۆيزەنبۋرگ، نيمەگك، كوسۆيگ قالالارىن جانە گەتتين، كرانە، گولتسوۆ، گرەبەن، گەرتسكە، رەەتتس ءىرى ەلدى مەكەندەرىن العان.

3-مامىر كۇنى بولعان ۇرىستاردا مايدان اسكەرلەرى  23700 نەمىس سولداتى مەن وفيتسەرىن تۇتقىنداپ، 57 ۇشاقتى ولجالادى.

 ال بەرليندە قالانىڭ پوليسەي- پرەزيدەنتى (ساقشى)، پوليتسيا گەنەرال- لەيتەنانتى گەرۋم، بەرلين پوليتسياسىنىڭ باستىعى، پوليتسيا گەنەرال- مايورى حاينبۋرگ، يمپەريالىق كانسەلياريە كۇزەتىنىڭ باستىعى، س س بريگادەنفيۋرەرى مونكە تۇتقىنعا الىندى.

 2- بەلورۋس مايدانىنىڭ اسكەرلەرى گەرمانيانىڭ سولتۇستىگىندە، ودەر وزەنىنىڭ بويىندا ورنالاسقان شتەتتين قالاسىنىڭ سولتۇستىك جاعىندا ديۆەنوۆ بۇعازىنان ءوتىپ، ۆوللين قالاسىن جانە ليۋسنوۆ، كەر- تەنتين، يارمبوۆ، كودرام، رەبەرگ، گروسس جانە كلاين موكراتتس، زولدەمين ەلدى مەكەندەرىن الدى.

«ال 3- مامىر كۇنى بولعان ۇرىستاردا مايدان اسكەرلەرى نەمىستەردىڭ  22000-نان استام سولداتى مەن وفيتسەرىن تۇتقىنداپ، اۋەجايلاردان 240 ۇشاقتى ولجالادى»، - دەلىنگەن مالىمەتتە.

اۆتور: جاپپاربەرگەن ايبوتا