سوعىس: 1944 - جىلى ايتباي سۇلەيمەنوۆتى سول جاق كەۋدە قالتاسىنداعى جارىنىڭ حاتى اجالدان امان الىپ قالعان ەدى

 استانا. قازاقپارات - الماتى اۋىر ماشينا جاساۋ زاۋىتىنىڭ شويىن قۇيۋ سەحىنىڭ بۇرىنعى باستىعى، قۇرمەتتى مەتاللۋرگ ايتباي سۇلەيمەنوۆتىڭ تاعدىرى ءبىر كىتاپ، فيلمگە ارقاۋ بولارلىق.

ول مايدانعا 1942 - جىلى اتتاندى. 220- اتقىشتار ديۆيزياسى 653- اتقىشتار پولكىنىڭ تانكىگە قارسى ارتيللەريا ۆزۆودىنىڭ كومانديرى بولعان.

قىستا 1944 -جىلى ۆيتەبسكىدە ايقاس 12 ساعاتقا سوزىلدى. ول ءۇش رەت جاراقاتتاندى. ءبىر وق جۇرەگىنىڭ ءدال تۇسىنان وتكەن. ونى گيمناستەركاسىنىڭ سول جاق كەۋدە قالتاسىنداعى ايەلىنىڭ حاتى قۇتقارىپ قالدى. «جىگىتىم، سەنى ماحاببات قۇتقاردى. ەندى ءجۇز جاسايسىڭ»، - دەپ ايتقان حيرۋرگتىڭ ءسوزىن ەسىنە الدى ارداگەر. ونىڭ ايتۋىنشا، بۇگىندە تەك ءبىر حات قانا ۇيىندە ساقتالعان، قالعانى سانكت- پەتەربۋرگ، مينسك، كيەۆ مۇراجايلارىندا ساقتالۋدا.

 ا. سۇلەيمەنوۆكە وتا جاساعان دارىگەردىڭ اۋزى دۋالى بولدى. قىزىل جۇلدىز وردەنىمەن، ءبىرىنشى دارەجەلى وتان سوعىسى، ەكى ەڭبەك قىزىل تۋى وردەنىمەن ماراپاتتالعان ارداگەر 1 - مامىردا 101 گە كەلدى.