كەدەندىك باقىلاۋ الىنىپ تاستالعان سوڭ ءبىر تاۋلىك ىشىندە قىرعىزستان- قازاقستان شەكاراسىنان 190 جۇك كولىگى وتكەن

استانا. قازاقپارات - كەشە قىرعىز رەسپۋبليكاسى ەكونوميكا ءمينيسترى ولەگ پانكراتوۆ كەدەندىك باقىلاۋدى الىپ تاستاۋ تۋرالى شارت كۇشىنە ەنگەننەن كەيىنگى باقىلاۋ- وتكىزۋ بەكەتتەرىندەگى جاعدايمەن تانىسىپ قايتتى.

قىرعىز ۆەدومستۆوسى باسپا ءسوز قىزمەتىنىڭ حابارلاۋىنشا، قىرعىزستان ەۋرازيالىق ەكونوميكالىق وداقتىڭ تولىققاندى مۇشەسى اتانىپ، كەدەندىك باقىلاۋ الىنعان سوڭ، ازاماتتار شەكارادان بۇرىنعىداي ەش كەدەرگىسىز وتە الادى. كەدەندىك باقىلاۋدى دوعارۋ نەگىزىنەن جۇكتەردى وتكىزۋ پروتسەدۋرالارىنا اسەر ەتەدى.

سەگىز وتكىزۋ بەكەتى ارقىلى 120 كولىك قازاقستانعا، ال 70 جۇك كولىگى قىرعىزستانعا ءوتتى. قىرعىزستان ەكونوميكا مينيسترلىگى بۇل كورسەتكىش قىرعىزستاننىڭ ە ا ە و- عا كىرگەنگە دەيىنگىدەن ەكى ەسە ۇلكەن ەكەندىگىن حابارلادى.

ۆەدومستۆوداعىلاردىڭ مالىمەتىنشە، بەكەتتەردەگى باقىلاۋ قاراپايىم رەجيمدە ءجۇرىپ جاتىر. تەك كەدەندىك باقىلاۋ عانا دوعارىلدى. كوممەرتسيالىق تاۋارلارى بار جۇك كولىكتەرى مەملەكەتتىك باقىلاۋدان وتكەندىگى تۋرالى ارنايى تالون الۋى كەرەك. تاعام ونىمدەرى بار كولىكتەر فيتوسانيتارلىق جانە ۆەتەرينارلىق باقىلاۋدان وتەدى. شەكارانى كەسىپ وتەتىن ادامدار عانا قالاعاندارىنشا جۇك الىپ وتە الادى.

ايدىڭ سوڭىنا دەيىن بارلىق بەكەتتەردە قىرعىزستان ەكونوميكا مينيسترلىگىنىڭ قىزمەتكەرلەرى جۇمىس ىستەيدى.

ەسكە سالا كەتەيىك، قازاقستان مەن قىرعىزستان اراسىنداعى شەكارا 12- تامىز كۇنى اشىلدى. شەكارانى اشۋ تۋرالى وكىمدى نۇرسۇلتان نازاربايەۆ پەن المازبەك اتامبايەۆ تەلەكوپىر ارقىلى شىعاردى.