ءبىر اپتا ىشىندە ەلىمىزدە «ءىزىن سۋىتپاي» 18 كىسى ءولتىرۋ قىلمىسى اشىلدى

نۇر-سۇلتان. قازاقپارات - ءبىر اپتا ىشىندە ەلىمىزدىڭ اۋماعىندا 3004 قىلمىس جاسالدى.

بۇل تۋرالى ق ر ىشكى ىستەر مينيسترلىگىنىڭ رەسمي وكىلى نۇردىلدا وراز ءمالىم ەتتى، دەپ حابارلايدى قازاقپارات ءتىلشىسى.

«ءبىر اپتا ىشىندە 3004 قىلمىس جاسالدى، ونىڭ 2046 تاۋلىك ىشىندە اشىلدى. پوليتسيا قىزمەتكەرلەرى «ءىزىن سۋىتپاي» 18 كىسى ءولتىرۋدى، 6 ولىمگە اكەپ سوققان دەنساۋلىققا قاساقانا اۋىر زيان كەلتىرۋدى، 3 قاراقشىلىق، 27 توناۋ جانە 449 بوتەن مۇلىكتى ۇرلاۋ قىلمىستارىن اشتى»، - دەدى رەسمي وكىل ءى ءى م باسپا ءسوز الاڭىندا وتكەن بريفينگ بارىسىندا.

سونىمەن قاتار ول مەملەكەت باسشىسى قاسىم-جومارت توقايەۆ باستاماشى بولعان «حالىق ۇنىنە قۇلاق اساتىن مەملەكەت» تۇجىرىمداماسى ءىس جۇزىندە ازاماتتار مەن مەملەكەت اراسىنداعى ديالوگ، ءوزارا ءىس- قيمىل جانە ىنتىماقتاستىققا جاڭا نەگىز قالاتىندىعىن ايتتى.

«ونىڭ باستى يدەياسى - ازاماتتاردىڭ ماسەلەلەرىن ەستۋ جانە كورۋ عانا ەمەس، ولارعا دۇرىس جانە وبەكتيۆتى جاۋاپ بەرۋ، ادامدارمەن اشىق ديالوگ جۇرگىزە ءبىلۋ. بۇگىنگى تاڭدا ءبىز تىڭداۋشى مەملەكەتتىڭ تۇجىرىمداماسىن ءىس جۇزىندە كورىپ وتىرمىز. قازاقستاندىق پوليتسيا حالىق تاراپىنان تۇسكەن ساۋالدارعا بارىنشا جەدەل جاۋاپ قايتارۋعا، شىنايى شەشىمدەر مەن جاۋاپتار ۇيىمداستىرۋعا تىرىسادى»، - دەدى نۇردىلدا وراز.

اۆتور: مارلان جيەمباي