بىلتىر ەلوردادا 18 مىڭ قىلمىس تىركەلدى
بۇل تۋرالى نۇر-سۇلتان قالاسى پوليتسيا دەپارتامەنتىنىڭ باسشىسى ەرجان سادەنوۆ حالىققا ەسەپ بەرۋ كەزىندە ايتتى، دەپ حابارلايدى قازاقپارات.
پوليتسيا دەپارتامەنتىنىڭ باسشىسى بايانداماسىن وتكەن جىلعى جەدەل-قىزمەت جۇمىستارىن قورىتىندىلاۋدان باستادى.
«2019 -جىلى 2018 -جىلمەن سالىستىرعاندا قىلمىس سانى 5720 عا، ياعني 24 مىڭنان 18 مىڭعا تومەندەدى. ادام ءولتىرۋ، دەنساۋلىققا اۋىر زيان كەلتىرۋ، قاراقشىلىق، توناۋ، ۇرلاۋ، بۇزاقىلىققا قاتىستى قىلمىستار ازايدى. قوعامدىق ورتالاردا جاسالاتىن قىلمىس %38,6، كوشەدە جاسالاتىن قىلمىس %45,4، جاسوسپىرىمدەر اراسىنداعى قىلمىس %10,7 تومەندەدى»، - دەيدى ەرجان سادەنوۆ.
سونداي-اق ول دەپارتامەنت باسشىلىعى اپتا سايىن ازاماتتاردى قابىلداپ، ماسەلەلەرىن شەشۋ ءۇشىن ناقتى شارالار قابىلداپ جاتقانىن اتاپ ءوتتى.
«سونىمەن قاتار، بىلتىر قالا تۇرعىندارىنا 1 ميلليون 300 مىڭ قىزمەت ءتۇرى كورسەتىلدى. ولار: ازاماتتاردى تۇرعىلىقتى جەرلەرى بويىنشا تىركەۋ، جەكە كۋالىكتى، ءتولقۇجاتتى، مەكەنجاي انىقتاماسىن راسىمدەۋ جانە تاعى باسقا قىزمەت تۇرلەرى»، - دەدى ول.
