قازاقستان- قىتاي ساۋدا اينالىمى 18 ميلليارد دوللارعا جەتتى
بۇل تۋرالى قىتايدىڭ الماتىداعى باس كونسۋلى جاڭ ۋەي ايتتى، دەپ حابارلايدى «قازاقپارات» ح ا ا ءتىلشىسى.
2017 -جىلدى قورىتىندىلاعان باس كونسۋل قازاقستان مەن قىتاي قارىم- قاتىناسى ءۇشىن وتكەن جىل ناتيجەلى بولعانىن اتاپ ءوتتى.
«قازاقستان ءۇشىن دە، قىتاي ءۇشىن دە 2017 -جىل ناتيجەلى بولدى. ءبىز بىلتىر ەكى ەلدىڭ ديپلوماتيالىق قاتىناسىنىڭ 25 -جىلدىعىن اتاپ وتتىك. قازاقستان قىسقى ۋنيۆەرسيادانى ءساتتى وتكىزدى، ءبىز وعان قىتاي تاريحىندا بولماعان ستۋدەنتتەردىڭ ەڭ كوپ دەلەگاتسياسىن جىبەردىك. قىتاي رەسپۋبليكاسىنىڭ مالىمەتى بويىنشا ەكى ەلدىڭ ساۋدا اينالىمى 2017 -جىلى 18 ميلليارد دوللارعا جەتتى، ول 2016 -جىلمەن سالىستىرعاندا 37,4 پايىزعا جوعارى»، - دەدى باس كونسۋل.
سونداي-اق جاڭ ۋەي ءوز قۇزىرىنىڭ اياسىنا كىرەتىن كونسۋلدىق وكرۋگتە ەكى ەل اراسىندا جۇزەگە اسىپ جاتقان بيزنەس جوبالاردىڭ جارتىسى ورنالاسقانىن ايتتى.
«كونسۋلدىق وكرۋگكە 4 وبلىس، 1 قالا كىرەدى. ولار: شىعىس قازاقستان، الماتى، جامبىل جانە وڭتۇستىك قازاقستان وبلىستارى مەن الماتى قالاسى. يندۋستريالاندىرۋ اياسىنداعى ەكى ەلدىڭ جالپى سوماسى 27 ميلليارد دوللاردان اساتىن 51 ءىرى جوباسىنىڭ جارتىسى مەنىڭ وكرۋگىمە تيەسىلى»، - دەدى باس كونسۋل.
باس كونسۋل بولاشاقتا جىلىنا 700 ميلليون تۋريست قىتايدان شەتەلگە شىعاتىنىن ايتتى.
«2017 -جىلى قىتايدان 129 ميلليون ادام شەتەلگە شىقتى. بولاشاقتا جىلىنا 700 ميلليون تۋريست شىعادى دەگەن بولجام بار. بۇل قازاقستان ءۇشىن ءتۋريزمدى دامىتۋدىڭ ءبىر مۇمكىندىگى جانە قازاقستان ورتالىق ازياعا شىعاتىن تۋريستىك ترانزيت بولا الادى»، - دەدى ول.
