ۆەتنام تۇرعىنىنىڭ اسقازانىنان 18 جىل بۇرىن قالىپ قويعان قايشى الىندى

استانا. قازاقپارات - ۆەتنامدا تۇراتىن ما ۆان نيات اتتى 54 جاسار ازاماتقا 1998 -جىلى بولعان اۆتوموبيل اپاتىنان سوڭ اسقازانىنا وپەراتسيا جاسالعان.

ارادا تەك 20 جىلعا جۋىق ۋاقىت وتكەن سوڭ ۆان نياتانىڭ ءىشى اۋىرىپ، اۋرۋحاناعا كەلگەن. سول كەزدە بارىپ، دارىگەرلەر ونىڭ اسقازانىنان 15 سانتيمەترلىك قايشىنى كورگەن. ونى وپەراتسيا جاساعان سالاق دارىگەر توق ىشەكتىڭ جانىنا قالدىرىپ كەتكەن، دەپ جازادى لايف. رۋ. قايشىنى الىپ تاستاۋ ءۇشىن دارىگەرلەرگە 3 ساعات قاجەت بولدى. جەرگىلىكتى ب ا ق وكىلدەرىنىڭ حابارلاۋىنشا، ەكىنشى قايتارا جاسالعان وپەراتسيا ەر ازاماتتىڭ دەنساۋلىعىنا اسا اۋىرلىق تۇسىرمەگەن جانە ول وسى كۇندە ساۋىعىپ كەلەدى. بۇل جاعداي قوعام اراسىندا ۇلكەن رەزونانس تۋدىردى. قۇقىق قورعاۋ ورگانىنىڭ قىزمەتكەرلەرى قازىر سول كەزدەگى وپەراتسيانى جاساعان ماماندى ىزدەستىرىپ جاتىر.