الەمنىڭ 18 ەلىن تەگىن ارالاعان جاس ساياحاتشى قازاقستانعا ورالدى - فوتو

ول ءوزىنىڭ سوڭعى ساپارىندا وڭتۇستىك ازيا ەلدەرىن اۆتوستوپپەن (جول بويى كەزىككەن كولىككە اقسىز وتىرۋ) ساياحاتتاپ كەلدى.
جاس ساياحاتشى ەڭ العاش رەت 19 جاسىندا جولعا شىققان.
كۇللى الەمدى جاياۋ ارالاپ كەلۋ تۋرالى يدەيا قالانىڭ ىشىندە جاياۋ جۇرۋدەن باستالدى.
«مەن بىردە مەگا ورتالىقتان ۇيگە دەيىن جاياۋ جەتتىم. ءۇيىم قالانىڭ سىرتىندا. 30 شاقىرىمداي جەر ءجۇرىپپىن. سودان مەن مۇمكىن ودان دا ارتىق جۇرە الاتىن بولارمىن دەگەن وي تۋدى. سوسىن اۆتوستوپپەن ساياحاتتاۋعا كوشتىم. العاشقى ساپارىمدا رەسەيدىڭ بارلىق قالالارىن ارالادىم. سوسىن ت م د ەلدەرىن، قىرعىزستان، وزبەكستان، تاجىكستان، بەلارۋس، ۋكراينا ەلدەرىن ارالادىم. ودان كەيىن گەوگرافيا كەڭەيە باستادى. ازەربايجان، تۇركيا، گرۋزيا، مولدوۆا، موڭعوليا دەپ كەتە بەرەدى»، - دەدى ول قازاقپارات تىلشىسىنە بەرگەن سۇحباتىندا.
جولدا ساياحاتشى نەبىر حيكايانى باسىنان كەشىرگەن. اش قۇرساق كەلە جاتىپ، ءىرى كولەمدە اقشا تاۋىپ العان. ايدالا تۇنەپ جاتقاندا، يت- قۇسقا جەم بولا جازداعان.
بيىل ساياحاتشى وڭتۇستىك ازيا ەلدەرىن ارالاپ كەلدى. الدىمەن قىتاي، سوسىن لاوس، كامبودجا ەلدەرىنە بارعان. سودان سوڭ شري- لانكاعا بارىپ توقتايدى. تروپيكالىق مەملەكەت جاپادان جالعىز قالتاسىندا كوك تيىنى جوق تۋريستى قۇشاق جايا قارسى الا قويمادى.
«شري- لانكالىقتار باي تۋريستەرگە ۇيرەنىپ قالعان. اقشاسىز ەشقاشان ەشقانداي تىرلىك جاسامايدى. ول وتە كەدەي مەملەكەت. مەن وندا تويا تاماق ىشپەدىم. كوبىنە دالادا تۇنەدىم. ۆيزامنىڭ مەرزىمى ءبىتىپ كەتكەن سوڭ 2 ايداي سول ەلدە جاتىپ قالدىم. كوبىنە جاياۋ ءجۇردىم. وندا اۆتوستوپ دەگەن تۇسىنىك جوق»، - دەدى ول.
سەرگەي شري- لانكادان مالديۆ ارالدارىنا ۇشىپ كەتپەك بولعان. ءبىراق اقشاسى بولماعان سوڭ قازاقستانعا قايتۋعا تۋرا كەلدى. ءوزىنىڭ باسىنداعى جاعدايدى ايتىپ، ءۇندىستانداعى قازاقستان كونسۋلدىعىنا حابارلاسقان ەكەن. ديپلوماتيالىق ميسسيا وكىلدەرى كەز كەلگەن ساياحاتشىعا بيلەت الىپ بەرە المايتىندىعىن ايتقان. امال جوق، 21- تۋعان كۇنىن شري- لانكادا وتكىزەدى.
ءتىلى مەن ءدىنى بوتەن ەلدە ساياحاتشى تويا تاماق ىشپەگەن.
«7 اي بويى ولاردىڭ ءداستۇرلى تاعامدارى - كۇرىشپەن قورەكتەندىم. ەتتى قاتتى اڭسادىم. كوكەنىستەرى دە ءدامسىز. ت م د ەلدەرىندە تاماقپەن ەشقانداي پروبلەما بولعان جوق»، - دەدى جاسوسپىرىم.
سونداي- اق، ول قىتايلىقتارمەن تەك سمارتفونداعى اۋدارماشى قوسىمشا ارقىلى سويلەسكەن.
ونىڭ ايتۋىنشا، وڭتۇستىك ازيادا ەڭ قوناقجاي ەل - قىتاي.
ساياحاتشى 26 كۇننىڭ بارلىعىندا قوناق ۇيلەردە تەگىن تۇنەپ شىققان.
«قىتايلىق ازامات ماعان 200 يۋان بەردى. ول 32 دوللار. ۆيزانىڭ قۇنى سول شامالاس بولاتىن. لاوسقا جەتكەن سوڭ شەكارادا وتىراتىن ايەل ماعان 80 مىڭ لاوس ۆاليۋتاسىنا ايىرباستاپ بەرگەن. كەيىن بىلگەنىمدەي، ول مەنى الداپ سوققان. ماعان تەك 8 دوللار ۇستاتقان ەكەن. ءسويتىپ ەكى ەلدىڭ اراسىندا قيىن جاعدايدا قالدىم. جولىم بولعىشتىعى سونداي، شەكارادا قىزمەت ەتەتىن لاوستىق ازامات ماسكەۋدە وقىعان ورىس ءتىلىن بىلەتىن ادام بولىپ شىقتى. پحۋ ۆەن مەنىڭ ۆيزامدى ءوزى تولەپ الىپ بەردى»، - دەدى ول.
جاس جىگىتتى تۋعان- تۋىستارى ۇيىنەن جىراققا قالايشا جالعىز جىبەرگەنىن سۇرادىق: «اناما كەرەگىم بولماعان سوڭ، وسىلاي دالا كەزىپ ءوستىم»، - دەدى ول.
بويشاڭ كەلگەن ارىق جىگىت سالماعى 35 كەلى بولاتىن ريۋكزاكتى قالاي كوتەرىپ جۇرگەنىنە تاڭعالدىق.
«مەنىڭ اقشام جوق، ءۇيىم جوق، وتباسىم جوق. مەندە تەك قازاقستاننىڭ تۋىن كورسەتىپ جۇرسەم دەگەن ۇلكەن ىنتا بار»، - دەدى ول.
دەمەۋشى تابىلسا از كۇندە سەرگەي افريكا كونتينەنتىنە اتتانباق. كەنيا، تانزانيا، موزامبيك، زامبيا، ناميبيا ەلدەرىنەن ياحتامەن وڭتۇستىك امەريكاعا جول تارتادى.