قازاقستاندا ورمان 188 مىڭ گەكتارعا كوبەيدى
ق ر ەكولوگيا، گەولوگيا جانە تابيعي رەسۋرستار مينيسترلىگىنىڭ كەڭەيتىلگەن القا وتىرىسىندا ۆيتسە-مينيستر ەرلان نىسانبايەۆ ورمان شارۋاشىلىعى سالاسىنداعى 2020-جىلعى جۇمىس قورىتىندىسىن باياندادى.
«مەملەكەت باسشىسىنىڭ ورمان قورىندا 5 جىل ىشىندە 2 ميلليارد اعاش وتىرعىزۋ جونىندەگى تاپسىرماسىن ورىنداۋ اياسىندا وبلىس اكىمدىكتەرىمەن بىرلەسىپ وڭىرلەر بويىنشا ورمانداردى مولىقتىرۋ مەن ورمان ءوسىرۋ جونىندەگى كەشەندى جوسپارلار ازىرلەنىپ، بەكىتىلدى. ورمان وتىرعىزۋدىڭ ەڭ كوپ كولەمى تۇركىستان، قىزىلوردا جانە جامبىل وبلىستارىندا، سونداي-اق سەمەي مەن ەرتىس ورمانى ورمان رەزەرۆاتتارىنىڭ اۋماعىندا بولجانىپ وتىر»، - دەدى ءوز سوزىندە ۆيتسە-مينيستر.
ول مينيسترلىكتىڭ ورمان شارۋاشىلىعى جانە جانۋارلار دۇنيەسى كوميتەتىنىڭ تابيعات قورعاۋ مەكەمەلەرىنىڭ جانە وبلىس اكىمدىكتەرىنىڭ ورمان قورعاۋ مەكەمەلەرىنىڭ كۇشىمەن 5 جىل ىشىندە 843 مىڭ گەكتار الاڭدا 1,7 ميلليارد اعاش وتىرعىزىلاتىنىن اتاپ ءوتتى. كورسەتىلگەن شارالار 2030-جىلعا قاراي ەلدىڭ ورماندىلىعىن %5 دەيىن جەتكىزۋگە مۇمكىندىك بەرەدى.
«مەملەكەتتىك ورمان قورى اۋماعىندا ورمان ورتتەرىنىڭ 701 جاعدايى تىركەلدى، ولاردىڭ اۋدانى 41,8 مىڭ گەكتاردى قۇرادى، رەسپۋبليكا بويىنشا جالپى زالال - 2,1 ميلليارد تەڭگە»، - دەپ مالىمدەدى ەرلان نىسانبايەۆ.
ورمان ورتتەرىنىڭ ەڭ كوپ اۋداندارى جامبىل، شىعىس قازاقستان، باتىس قازاقستان، پاۆلودار جانە تۇركىستان وبلىستارىندا، سونداي-اق «سەمەي ورمانى» رەزەرۆاتىنىڭ اۋماعىندا تىركەلگەن.
ۆيتسە-مينيستر وتكەن جىلى زاڭسىز اعاش كەسۋ سانى %25 تومەندەگەنىن، الايدا زاڭسىز كەسىلگەن اعاش كولەمىنىڭ ءوسۋى تىركەلگەنىن حابارلادى.
«اعاشتاردى زاڭسىز كەسۋ، جويۋ جانە ءبۇلدىرۋ جاۋاپكەرشىلىگىن ارتتىرۋ ماقساتىندا قولدانىستاعى زاڭناماعا ايىپپۇلداردى ۇلعايتۋ جانە بۇزۋشىلارعا سانكتسيالاردى قاتاڭداتۋ بولىگىندە وزگەرىستەر مەن تولىقتىرۋلار ەنگىزىلدى»، - دەپ تولىقتىردى ءمينيستردىڭ ورىنباسارى.
2020-جىلدىڭ قورىتىندىلارىنىڭ قاتارىندا «وسىمدىكتەر الەمى تۋرالى» زاڭ جوباسىن ازىرلەۋ دە بار.
سونىمەن قاتار، ۆيتسە-مينيستر ۇلتتىق پاركتەردە ەكولوگيالىق تۋريزمدى دامىتۋعا كوپ كوڭىل بولىنگەنىن اتاپ ءوتتى.
«الماتى توبىنداعى ىلە - الاتاۋ، كولساي- كولدەرى، شارىن، التىن ەمەل سياقتى ءتورت مەملەكەتتىك ۇلتتىق تابيعي پاركتەردىڭ تۇجىرىمداماسى قابىلداندى. وسى ۇلتتىق پاركتەردىڭ جانىنان قوعامدىق كەڭەستەر قۇرىلدى. 2020-جىلى ىلە- لاتاۋ ۇلتتىق پاركىندە جوبانى جۇزەگە اسىرۋعا 900 ميلليون تەڭگە ينۆەستيتسيالاندى»، - دەدى ەرلان نىسانبايەۆ.
وسى جۇمىستار شەڭبەرىندە 2025-جىلعا قاراي ۇلتتىق پاركتەردىڭ الماتى توبىنا جەكە ينۆەستيتسيالاردىڭ كولەمى 31 ميلليارد تەڭگەنى قۇرايدى، ۇلتتىق پاركتەردىڭ رەكرەاتسيالىق جۇكتەمە نورمالارىن ەسكەرە وتىرىپ، تۋريستەردىڭ كۇتىلەتىن اعىنى 2 ميلليون ادامنان اسادى دەپ كۇتىلۋدە.
ورمان شارۋاشىلىعىن، ەرەكشە قورعالاتىن تابيعي اۋماقتاردى دامىتۋعا جانە بيوارتۇرلىلىكتى ساقتاۋعا باعىتتالعان «جاسىل قازاقستان» ۇلتتىق جوباسىن ازىرلەۋ جوسپاردا بار.
massaget.kz