تەڭىز جاعالاۋىنان 1850 جىل بۇرىنعى قولا مونەتا تابىلدى

تەل-اۆيۆ. قازاقپارات - يزرايلدىڭ سولتۇستىگىندە حايفا قالاسىنىڭ ماڭىنداعى كارمەل جاعالاۋىنداعى تەڭىز تۇبىنەن ريمنىڭ اي قۇدايى مەن شايان جۇلدىزناماسىنىڭ بەلگىسى بەينەلەنگەن 1850 جىلدىق سيرەك كەزدەسەتىن قولا مونەتا تابىلدى، دەپ حابارلايدى قازاقپارات CBS News-كە سىلتەمە جاساپ.

يزرايل ارحەولوگتارى يمپەراتور انتونين پيدىڭ (ب. ز. د. 138-161 -جىلدار) الەكساندريادا (قازىرگى ەگيپەت) سوعىلعان ريم ءداۋىرىنىڭ وتە جاقسى ساقتالعان مونەتاسىن كورسەتتى. ول ون ءۇش مونەتا سەرياسىنا تيەسىلى. ءار ءتۇرلى زودياك بەلگىلەرى بەينەلەنگەن ون ەكى جانە بارلىق بەلگىلەر توپتاستىرىلعان ون ءۇشىنشى مونەتا.

مونەتادا ريم يمپەرياسىندا سالىستىرمالى تىنىشتىق ورناعان 144/145 ج. ج. انتونين پيدىڭ بيلىگىنىڭ سەگىزىنشى جىلىن بىلدىرەتىن «سەگىزىنشى جىل» كۇنى بەينەلەنگەن.

تەڭىز ارحەولوگياسىنىڭ جەتەكشىسى دجەيكوب شارۆيت مونەتا باسقا مونەتالاردىڭ «كىشىگىرىم قازىنا قويماسىنان» تابىلعانىن جانە جاقىن جەردە كەمە اپاتى بولعانىن كورسەتەدى دەپ مالىمدەدى.

بۇل ولجانى يزرايلدىڭ كونە جادىگەرلەر باسقارماسىنىڭ نۋميزماتيكا جونىندەگى ساراپشىسى ليور ساندبەرگ كونە جادىگەرلەردى جاعالاۋداعى دامىتۋ جۇمىستارىنان قورعاۋعا باعىتتالعان تەڭىز زەرتتەۋى كەزىندە انىقتادى. مۇنداي مونەتا يزرايل جاعالاۋىندا العاش رەت تابىلدى.

فوتو: facebook.com/AntiquitiesEN