سايلاۋ زاڭىن بۇزعان 17 ۋچاسكەلىك كوميسسيا مۇشەسى جاۋاپقا تارتىلدى
بۇل تۋرالى ورتالىق سايلاۋ كوميسسياسىنىڭ ءتوراعاسى نۇرلان ءابدىروۆ ايتتى، دەپ حابارلايدى قازاپارات ءتىلشىسى.
«ءوز وكىلەتتىكتەرىنە سايكەس، سايلاۋ ورگاندارى ازاماتتار مەن بىرلەستىكتەردىڭ حابارلارىنا جەدەل دەن قويىپ، ءتيستى شارالار قابىلدادى. سايلاۋ زاڭناماسىن بۇزعانى ءۇشىن ۋچاسكەلىك سايلاۋ كوميسسيالارىنىڭ شەشىمدەرى بويىنشا ولاردىڭ 14 مۇشەسى كوميسسيالاردىڭ جۇمىسىنا قاتىسۋدان دەرەۋ شەتتەتىلدى. وسىلايشا، ولارعا «سايلاۋ تۋرالى» كونستيتۋتسيالىق زاڭدا كوزدەلگەن كونستيتۋتسيالىق قۇقىقتىق جاۋاپكەرشىلىك شارالارى قولدانىلدى»، - دەدى ول بريفينگ بارىسىندا.
ونىڭ اتاپ وتۋىنشە، الەۋمەتتىك جەلىلەردە جانە مەسسەندجەرلەردە ىقتيمال بۇزۋشىلىقتار تۋرالى اقپاراتتىق ماتەريالداردىڭ تارالۋىنا جانە سايلاۋ كوميسسياارىنا ازاماتتاردان، ساياسي پارتيالاردىڭ بايقاۋشىلارىنان، كانديداتتاردان وتىنىشتەردىڭ تۇسۋىنە بايلانىستى و س ك باس پروكۋراتۋراعا تەكسەرۋ جانە قۇقىقتىق باعالاۋ جۇرگىزۋ تۋرالى سۇراۋ سالۋ جىبەرگەن.
«باس پروكۋراتۋرانىڭ رەسمي اقپاراتى بويىنشا داۋىس بەرۋ كۇنى 34 ادامنىڭ تاراپىنان قۇقىقبۇزۋشىلىق تىركەلگەن. ولاردىڭ ىشىندە 17 ۋچاسكەلىك كوميسسيا مۇشەسىنە اكىمشىلىك قۇقىق بۇزۋشىلىق تۋرالى كودەكستىڭ 110-بابى بويىنشا ايىپپۇل سالىندى. ولاردىڭ بارلىعى جاۋاپقا تارتىلدى»، - دەدى نۇرلان ءابدىروۆ.
