ابايدىڭ 175 جىلدىعى: ەلوردادا رەسپۋبليكالىق ايتىس جاڭا فورماتتا وتەدى
«ەرتەڭگى ايتىس - اباي بابامىزدىڭ 175 جىلدىعىنا وراي وتەتىن شارالاردىڭ ءبىرى. ايتىس ساعات 14.00دە باستالادى. 16 اقىن قاتىسادى. ايتىس مادەنيەت جانە سپورت مينيسترلىگىنىڭ ۇيىمداستىرۋىمەن، «Nur Otan» پارتياسىنىڭ قولداۋىمەن وتكىزىلىپ جاتىر. جالپى، مينيسترلىك پەن پارتيا وڭىرلەردە وسىنداي ايتىستاردى وتكىزۋدى جوسپارلاۋدا. بۇل- بيىلعى جىلدىڭ باستى ايتىسى بولادى»، - دەدى مادەنيەت جانە سپورت ۆيتسە- ءمينيسترى نۇرعيسا داۋەشوۆ و ك ق- دا وتكەن باسپا ءسوز ءماسليحاتىندا.
ال قازاقستاننىڭ ەڭبەك سىڭىرگەن قايراتكەرى ءجۇرسىن ەرماننىڭ ايتۋىنشا، ايتىس الدىندا اقىنداردىڭ رەيتينگى جاسالعان.
«جالپى، كەيىنگى جىلدارى تابيعي قالپىنان شىعارىپ الدىق پا دەگەن قاۋىپ بار. سوناۋ كۇنى ورالدا «التىن دومبىرانىڭ» الدىنداعى تيمبيلدينگتە 60-70 اقىن باس قوسىپ اقىلداسىپ، ايتىستاردىڭ شىنايىلىعىنا قول جەتكىزۋ شاراسىن قولدانايىق دەپ شەشتىك. ەرتەڭگى ايتىس قالاي وتەدى ەكەن دەپ، ءوزىمىز دە قوبالجىپ وتىرمىز. ويتكەنى، ايتىستىڭ سۋىرىپ سالما قاسيەتىنە بۇرىلايىق دەپ وتىرمىز. جاسىراتىنى جوق، اقىنداردى بۇرىن جۇپتاپ قوياتىنبىز. دايىندالىپ كەلەتىن دە، قانشا اقىن بايقاتپايمىن دەگەنىمەن، كىشكەنە جاتتاندىلىق بار ەكەنىن سىزدەر دە، ءبىز دە جاقسى بىلدىك. سوعان جول بەرمەۋ ءۇشىن حالىقتىڭ الدىندا ءبىرىنشى رەت جۇپتايىق دەپ وتىرمىز. ياعني، كىممەن كىمنىڭ ايتىساتىنىن ەشكىم بىلمەيدى»، - دەدى ول.
ءجۇرسىن ەرمان جاشىك قويىپ، سونىڭ ىشىندەگى شاردىڭ ىشىندە سالىنعان 16 اقىننىڭ ەسىمىمەن جۇپتار بەلگىلەنەتىنىن جەتكىزدى. زالدان كەز كەلگەن كورەرمەن شىعىپ، شاردى سۋىرىپ، جۇپتاردى بەلگىلەيدى. جالپى ايتىستىڭ جۇلدە قورى - 10 ميلليون 400 مىڭ تەڭگە.
«جاتتاندى ايتىسقا جول بەرمەيمىز. ءۇش- ءتورت شۋماقپەن قايىمداسىپ، جاۋاپتاسىپ ايتىسادى. جەتى تورەشى (قازىلار القاسىنىڭ ءتوراعاسى - نەسىپبەك ايت ۇلى) بۇرىنعىشا ۇپاي ارقىلى داۋىس بەرمەيدى. ءار قازىنىڭ الدىندا ەكى باتىرما تۇرادى. قاي اقىنعا كوبىرەك كوك شام جانادى، سول ءسوزسىز ايتىستىڭ كەلەسى اينالىمىنا وتەدى. سوندىقتان، اقىنداردىڭ شىنايى قابىلەتىن كورسەتسەك دەيمىز»، - دەدى ءجۇرسىن ەرمان.
ايتىستا رۇستەم قايىرتاي ۇلى، مۇحتار نيازوۆ، ەركەبۇلان قاينازاروۆ، اسەم ەرەجە قىزى، مەيىربەك سۇلتانحان قاتارلى بەلگىلى اقىندار ءوزارا باق سىناسادى.
