سەمەيدە ابايدىڭ 175 جىلدىعىنا ارنالعان كورمە اشىلدى

وسكەمەن. قازاقپارات - سەمەي قالاسىندا ۇلى اقىننىڭ مەرەيتويىنا وراي مەكتەپ وقۋشىلارىنىڭ قولونەر بۇيىمدارىنىڭ كورمەسى اشىلدى، دەپ حابارلايدى قازاقپارات.

ابايدىڭ «جيدەباي-ءبورىلى» مەملەكەتتىك تاريحي-مادەني جانە ادەبي-مەموريالدىق مۋزەي-قورىعىندا قالاداعى 16№ مەكتەپ وقۋشىلارىنىڭ قولونەر بۇيىمدارىنىڭ كورمەسى ۇيىمداستىرىلدى. كەلۋشىلەر نازارىنا ۇسىنىلعان كارتينالارعا، كۇرىشتەن، كيىز بەن بوياۋلاردان جاسالعان ەكسپوزيتسيالارعا اقىننىڭ ءومىرى مەن شىعارماشىلىعى ارقاۋ بولعان. بۇل كورمەگە وقۋشىلار ءبىر جىل بويى دايىندالىپتى.

ءبىر بۇيىمعا كولەمى مەن تاقىرىپتىڭ كۇردەلىلىگىنە قاراي ون كۇننەن جارتى جىلعا دەيىن ۋاقىت جۇمسالعان. ءۇشىنشى سىنىپ وقۋشىلارىنىڭ قولىنان شىققان «اباي مەن شاكارىم جيدەبايدا» اتتى ەكسپوناتقا 10 كۇن ۋاقىت كەتىپتى. بۇيىمنىڭ ءساتتى شىعۋىنا ۇستازدار مەن اتا-انالار دا ءوز ۇلەستەرىن قوسقان.

«وقۋشىلارىمىز ءار كورمەگە ۇنەمى تىڭعىلىقتى دايىندالادى. بۇگىنگى كورمەگە قويىلعان بۇيىمدار ءار سىنىپ وقۋشىلارىنىڭ قولىنان شىققان. بۇل بالالار ءۇشىن ۇلكەن تاجىريبە بولدى. بۇيىمدى ولار زەيىن قويىپ، زور قىزىعۋشىلىقپەن جاسادى»، - دەيدى مەكتەپتەگى تەحنولوگيا ءپانىنىڭ مۇعالىمى يمانبەك حامزين.