ءماشھۇر ءجۇسىپ كوپەيەۆتىڭ 165 جىلدىق مەرەيتويى ءوتتى
ءماشھۇر ءجۇسىپ كوپەيەۆتىڭ 2006 -جىلى سالىنعان كەسەنە كەشەنىندە ناماز وقىلعاننان كەيىن مەرەكەلىك ءىس-شارالار باستالدى. مەرەكەگە وبلىس اكىمى اسايىن بايحانوۆ، ق ر پارلامەنتى ءماجىلىسىنىڭ ءتوراعاسى ەرلان قوشانوۆ، زيالى قاۋىم وكىلدەرى جانە ءوڭىردىڭ عىلىمي قوعامداستىعى قاتىستى.
ەرلان قوشانوۆ مەملەكەت باسشىسىنىڭ قۇتتىقتاۋ حاتىن وقىپ، ىزگى تىلەگىن جەتكىزدى.
تورايعىروۆ ۋنيۆەرسيتەتى «ءماشھۇر جولى» اۋديوكىتابىنىڭ، ءماشھۇر ءجۇسىپ كوپەيەۆتىڭ 10 تومدىق «تاڭدامالى شىعارمالار جيناعى» اتتى اۋديوكىتابىنىڭ تۇساۋكەسەرىن، سونداي-اق ءماشھۇرتانۋشىلاردىڭ كەزدەسۋىن وتكىزدى. بۇل ءىس-شارادا مادەنيەت جانە سپورت ءمينيسترى اسحات ورالوۆ، اقپارات جانە قوعامدىق دامۋ ءمينيسترى دارحان قىدىرالى، پارلامەنت سەناتىنىڭ دەپۋتاتى التىنبەك نۇح ۇلى، سونداي-اق ءماشھۇر ءجۇسىپتىڭ ۇرپاقتارى بايانداما جاسادى. ToU رەكتورى ەركىن سادىقوۆ قۇتتىقتاۋ ءسوز سويلەدى.
«بۇگىن ءبىز ءماشھۇر ءجۇسىپتى كورنەكتى ويشىل، ۇستاز جانە قوعام قايراتكەرى رەتىندە ەسكە الامىز. ول ناعىز پاتريوت رەتىندە ءارقاشان ءوز وتانىنا، حالقىنا پايدا اكەلۋگە دايىن بولدى. ول ءوزىنىڭ بار عۇمىرىن زەرتتەۋ مەن تانىمعا ارنادى، ءبىلىمدى جەتىلدىرۋگە قۇمار بولدى جانە قوعامدى اعارتۋشىلىققا باعىتتادى. ءماشھۇر ءجۇسىپتىڭ مۇراسى تۋرالى ايتاتىن بولساق، ونىڭ ءبىلىم مەن مادەنيەتكە قوسقان ۇلەسى وراسان زور. بابا مۇراسىن ۇرپاعى جالعاستىرىپ، بۇگىندە كوپ ەڭبەك جاسالىپ جاتىر»، - دەدى رەكتور.
وسىنداي اتاۋلى كۇندى مەرەكەلەۋ اياسىندا بايگە مەن كوكپاردان سپورتتىق ويىندار، قازاقشا كۇرەستەن جارىستار، سونداي-اق جىرشى، تەرمەشى جانە ايتىسكەرلەر اراسىندا رەسپۋبليكالىق بايقاۋ ءوتتى.
سونىمەن قاتار وزبەكستان مەن قىرعىزستاننان كەلگەن قولونەرشىلەردىڭ قاتىسۋىمەن حالىقارالىق ورتا ازيا جارمەڭكەسى، سۋرەتشىلەر كورمەسى جانە سپورتتىق جارىستاردىڭ جەڭىمپازدارىن ماراپاتتاۋ ءراسىمى ءوتتى.
