كوروناۆيرۋس تۋرالى 15 جاڭا فاكتى

دۇنيەجۇزىلىك دەنساۋلىق ساقتاۋ ۇيىمى (د د س ۇ) COVID-19 كوروناۆيرۋسىنىڭ تارالۋىنا تالداۋ جۇرگىزۋ ءۇشىن قىتايعا حالىقارالىق ساراپشىلار توبىن جىبەردى. ولاردىڭ جۇمىسىنىڭ قورىتىندىسى بويىنشا ۇلكەن باسپا ءسوز كونفەرەنتسياسى ءوتىپ، بەيجىڭگە، ۋحانعا، شەنچجەنگە، گۋانجوۋ مەن چەندۋگە بارۋ تۋرالى ارنايى ەسەپ جاريالاندى.

مۇندا ەڭ قىزىق فاكتىلەر مىنالار:

1. COVID-19 ادەتتە ۇلكەن قاشىقتىققا تارالمايدى. ناۋقاسپەن تىعىز بايلانىستا بولعاندا عانا اۋا تامشىلارى ارقىلى جۇعۋى مۇمكىن. سوندىقتان ەڭ الدىمەن ينفەكسيا جۇقتىرۋشىنىڭ وتباسى مۇشەلەرى اۋىرادى.

2. 2055 اۋرۋعا شالدىققان اۋرۋحانا قىزمەتكەرىنىڭ كوپشىلىگى ۇيدە نەمەسە ۋحاندا ىندەتتىڭ ەرتە ساتىسىندا، بارلىق ساقتىق شارالارى ساقتالماعان كەزدە جۇقتىرعان.

3. اۋرۋدىڭ ۇزاقتىعى ادەتتە ەكى اپتا. اۋىر جاعدايلاردا 3-6 اپتاعا دەيىن بارادى.

4. بۇگىندە ۋحان قالاسى ورتالىعى سانالاتىن حۋبەي پروۆينتسياسىندا 65 مىڭنان استام ادام اۋرۋ جۇقتىرعان. باسقا پروۆينتسيالاردان وعان مەديتسينالىق مەكەمەلەردىڭ 40 مىڭعا جۋىق قىزمەتكەرى جىبەرىلدى.

5. ناۋقاستارعا 45 اۋرۋحانا قىزمەت كورسەتىپ جاتىر، ولاردىڭ ىشىندە 6 ى - وتە اۋىر حالدە جاتقاندارعا، 39 ى - قاتتى اۋىرىپ جاتقاندار مەن 65 جاستان اسقانداردى ەمدەۋدە. قىسقا ۋاقىت ىشىندە 2600 ورىندىق ەكى جاڭا اۋرۋحانا بوي كوتەردى.

6. قازىرگى ۋاقىتتا قىتاي اپتا سايىن كوروناۆيرۋستى انىقتايتىن 1,6 ميلليون جيىنتىق شىعارىپ جاتىر. تەست سول كۇنى ناتيجە بەرەدى. ەلدە تەمپەراتۋراسى شىققان كەز كەلگەن ادام دارىگەرگە بارىپ، ۆيرۋسقا تەست تاپسىرادى. ۋحاننان شالعاي جاتقان گۋاندۋن پروۆينتسياسىندا 320000 ادام تەستىلەۋدەن ءوتىپ، سونىڭ ىشىندە %0,14 ى اۋرۋ جۇقتىرعانى انىقتالدى.

7. اۋرۋ بەلگىلەرى بىلىنبەگەن ناۋقاستار وتە سيرەك كەزدەسەدى. ۆيرۋس بەلگىلەرى اۋرۋ جۇقتىرعاننان كەيىن بىرنەشە كۇننىڭ ىشىندە پايدا بولادى.

8. ەڭ ءجيى كەزدەسەتىن بەلگىلەرى: قىزۋ كوتەرىلۋ (%88) جانە قۇرعاق جوتەل (%68)، السىزدىك (%38)، جوتەل كەزىندە قاقىرىق تاستاۋ (%33)، دەمىكپە (%18)، تاماق اۋىرۋ (%14)، باس اۋىرۋ (%14)، بۇلشىقەتتەردىڭ اۋىرۋى (%14)، قالتىراۋ (%11). جۇرەك اينۋ جانە قۇسۋ (%5)، مۇرىن بىتەلۋ (%5) جانە ديارەيا (%4) سيرەك كەزدەسەدى. تىنىس الۋ جولدارىنىڭ اسقىنۋى COVID-19 بەلگىلەرىنە جاتپايدى.

9. قىتايدا 44672 اۋرۋ جۇقتىرعان ادامدى تەكسەرگەن كەزدە ولاردىڭ ءولىم-ءجىتىمى ورتا ەسەپپەن %3,4 دى قۇراعان. بۇل كورسەتكىش جاسىنا، جىنىسىنا، دەنساۋلىعىنا بايلانىستى باسقا دا پروبلەمالاردىڭ بولۋىنا جانە دەنساۋلىق ساقتاۋ جۇيەسى رەاكسياسىنىڭ جىلدامدىعىنا بايلانىستى.

مىسالى، بۇرىن جۇرەك-قان تامىر اۋرۋلارى بولعان ناۋقاستار اراسىندا ءولىم دەڭگەيى %13,2، قانداعى قانتتىڭ جوعارى دەڭگەيى — %9,2، قىسىمى جوعارى ادامداردا - %8,4، سوزىلمالى رەسپيراتورلىق اۋرۋلارى بار ادامداردا - %8 بولعان. دەنساۋلىعىمەن ەشقانداي پروبلەماسى بولماعان ادامداردىڭ اراسىندا كوز جۇمعاندار - %1,4.

10. قىتاي اۋرۋدى ەمدەۋدىڭ ءار ءتۇرلى ادىستەرىن تەكسەرىپ، ولاردىڭ ەڭ ءتيىمدىسى ەل بويىنشا ەنگىزىلدى. وسىنىڭ ارقاسىندا ءولىم دەڭگەيى ءبىر اي بۇرىنعىدان تومەنىرەك.

11. ادام قانشالىقتى جاس بولسا، جۇقتىرۋ ىقتيمالدىعى مەن اسقىنۋلارى سوعۇرلىم از. قازىرگى ۋاقىتتا جۇقتىرعانداردىڭ %72,8 ى - 40 جاستان اسقان ادامدار. 19 جاسقا دەيىنگى جاستار مەن بالالار - اۋرۋ جۇقتىرعانداردىڭ %2,1 ىن قۇراپ وتىر.

12. ايەلدەر دە ەرلەر سياقتى ءجيى اۋىرادى. الايدا، اۋرۋ جۇقتىرعان قىتايلىق ايەلدەردىڭ %2,8 عانا وسى اۋرۋدان كوز جۇمسا، ال ەرلەردە بۇل كورسەتكىش %4,7 عا جەتتى. جۇكتىلىكتىڭ سوڭعى ايىندا اۋرۋ جۇقتىرعان ايەلدەردىڭ بالالارى ساۋ. جۇكتىلىكتىڭ ەرتە كەزەڭدەرىندە ينفەكتسيانىڭ ۇرىققا اسەرى تۋرالى ايتۋ ازىرگە ەرتە.

13. جاڭا ۆيرۋس گەنەتيكالىق جاعىنان %96 عا جارقاناتتارداعى كوروناۆيرۋس بەلگىلەرىنە جانە %86-92 عا كەسىرتكە تارىزدەس جاندىكتەر كوروناۆيرۋسىنا ۇقساس. وسىلايشا، مۋتاتسيالانعان ۆيرۋستىڭ جانۋارلاردان ادامدارعا بەرىلۋى COVID-19 پايدا بولۋىنىڭ ەڭ ىقتيمال سەبەبى بولىپ وتىر.

14. قاڭتار ايىنىڭ سوڭىندا قىتايدا اۋرۋ جۇقتىرعاندار سانى ازايۋدا. قازىرگى ۋاقىتتا ورتاشا العاندا كۇنىنە 329 جاڭا وقيعا تىركەلىپ وتىر. ءبىر اي بۇرىن ولاردىڭ سانى شامامەن 3000 بولدى.

15. ىندەتتى ۇستاپ تۇرۋدىڭ ەڭ ءتيىمدى فاكتورى - قىتاي بۇكىل ەل بويىنشا اۋرۋ جۇقتىرعاندار اراسىندا ساۋالنامالار وتكىزگەن. ولاردان باسقا ادامدارمەن جاقىن ارادا بولعان بايلانىستارى تۋرالى سۇراعان، سودان كەيىن ولاردى تەكسەرگەن. ول ءۇشىن ۋحاندا 1800 كوماندا جۇمىس ىستەپ جاتىر، ولاردىڭ ءارقايسىسىندا كەم دەگەندە 5 ادام بار.