بانكى جابۋدىڭ 15 ءتۇرلى قۇپياسى

 استانا. قازاقپارات - «قىستىڭ قامىن جاز ويلا» دەمەكشى، بانكى جابۋدىڭ ناۋقانى باستالىپ تا كەتتى. سەبەبى، ءۇي جاعدايىندا جاسالاتىن سالات پەن توساپتىڭ دۇكەن سالاتتارىمەن سالىستىرعاندا ءدامدى، ساپاسى وتە جوعارى بولادى.

 الايدا مۇنداي ونىمدەردى ۇزاق ساقتاۋ ءۇشىن ولاردىڭ قاقپاعىن دۇرىس تاڭداپ جانە جابۋ جولدارىن ءبىلۋ كەرەك. ال قازىرگى تاڭدا بانكى جاباتىن قاقپاقتار قاتارى مەتالدان، پوليەتيلەننەن نەمەسە بۇراپ جابا سالاتىن تەمىر ماتەريالداردان جاسالعان. سوندىقتان دا بانكىمەن جابىلاتىن ءونىم وسى قاقپاق تۇرلەرىمەن ساي كەلۋى قاجەت. ەندەشە نازارلارىڭىزعا بانكى جاپقاندا قاجەت بولاتىن تومەندەگىدەي ەرەجەلەردى ۇسىنامىز.

1. ارنايى قۇرالمەن جابىلاتىن قاقپاقتى قايناپ تۇرعان سۋعا سالىپ 3-4 مينۋت قايناتادى. سوسىن بانكى بەتىنە قويىپ، بۇراپ جابادى. ال جابىلعان بانكىلەردى ابدەن سۋىعانشا قاقپاعىن تومەن قاراتىپ توڭكەرىپ قويادى.

 2. پوليەتيلەن ماتەريالدان جاسالعان قاقپاقتى قايناپ جاتقان سۋعا سالىپ 5 مينۋت قايناتادى. سودان سوڭ ىستىق كۇيىندە بانكىگە كيگىزەدى. سۋىعان سوڭ ىدىستى توڭكەرىپ كورۋ كەرەك. ەگەر قاقپاق دۇرىس كيىلسە قاقپاق ورتاسى كىشكەنە ىشكە تۇسىڭكىرەپ تۇرادى.

 3. ءوزىن بۇراپ جابا سالاتىن قاقپاق پوليەتيلەن قاقپاق سەكىلدى قايناتىلىپ جابىلادى. ال مۇنداي قاقپاقپەن جابىلاتىن بانكى بۇراندالى بولۋ كەرەك. ال وسى قاقپاق تۇرلەرىمەن جابىلعان بانكىلەردى اشقاندا تىق ەتكەن دىبىس شىعۋ كەرەك.

 4. بانكى قاقپاقتارىن سۋعا ەمەس ميكروتولقىندى پەشكە سالىپ ىسىتسا دا بولادى. ول ءۇشىن قاقپاقتى جوعارعى ىستىعىنا 2 مينۋتقا عانا قويادى.

 5. بانكىلەردى قايناپ جاتقان ىستىق سۋعا قويىپ 2-3 مينۋتتان بۋلاپ زالالسىزداندىرادى.

 6. جۇمىس تەز ءبىتۋ ءۇشىن كولەمى ۇلكەن مانتى پىسىرەتىن (مانتاۆاركا) كاسترولگە سۋدى تولتىرا قۇيىپ قايناتادى. سوسىن ءبىر تاباعىنا سىيعانىنشا بانكىلەردى قاتارلاستىرا ورنالاستىرىپ، قايناپ جاتقان سۋ ۇستىنە 5-6 مينۋتقا قويادى.

7. سالات ونىمدەرىن جاپقاندا قاقپاق قانا ەمەس بانكىنىڭ تە تازا جۋىلىپ، دۇرىس زالالسىزدانعانىن جانە اۋزى ءبۇتىن بولعانىن قاداعالاۋ قاجەت. سەبەبى كىشكەنە بولسىن اۋىز بولىگىندە سىنىعى بار بانكىگە جابىلعان ونىمدەر اشىپ، جارامسىز بولىپ قالادى.

8. پوليەتيلەن نەمەسە بۇراپ جاباتىن قاقپاقتار جانە اۋىز بولىگى سىنعان بانكىلەرگە سالاتتان گورى ءتاتتى توساپتاردى جاپسا بولادى.

 9. توساپتى بانكىگە قۇيىپ جابار الدىن پراگمەنتتى قاعازدى اراققا مالىپ بەتىنە قويىپ، سوسىن قاقپاعىن جاپسا ۇزاق ۋاقىت ساقتالادى.

10. جابىلعان توساپتاردىڭ 1 جىلدان ارتىق ساقتاۋ ءۇشىن سالقىن ءارى قۇرعاق جەردە ۇستايدى.

 11. ەگەر جاپقان توساپ بىرنەشە كۇننەن سوڭ اتىلىپ كەتسە، بەتكى بولىگىن الىپ تاستاپ، ءاربىر ليترىنە 1 ستاقان قانت سالىپ قايناتىپ، بەتىنە شىققان كوپىرشىگىن قايتا- قايتا الىپ، كوپىرشىگى تاۋسىلعانشا قايناتىپ، قايتا قۇيىپ جابۋعا بولادى.

12. ءنارسۋعا (كومپوت) الدىمەن ءار 1 ليتر سۋىنا 20 گر قانت سالىپ ءشاربات (سيروپ) دايىندالادى. ءدامى ادەمى بولۋ ءۇشىن ءشارباتىن 1-2 كۇن بۇرىن دايىنداپ توڭازىتقىشقا سالىپ قويۋ قاجەت.

13. قىشقىل جەمىستەردەن جاسالعان ءنارسۋ ءدامى ادەمى، ءيىسى كەرەمەت بولۋ ءۇشىن 2-3 اس قاسىق اق شاراپ قۇيىپ جابادى.

 14. توساپ ءتۇسى ادەمى، ساقتالۋ مەرزىمى ۇزاق بولۋ ءۇشىن سىرلى ىدىستا قايناتادى.

 15. كەز كەلگەن سالات بەتىنە تازالانعان وسىمدىك مايىن 1 اس قاسىقتان قۇيىپ جاپسا، ءدامى كەرەمەت، ساقتالۋ مەرزىمى ۇزاق بولادى.

 

Massaget.kz