اقتاۋ مەكتەبىندە ءبىر سىنىپتا 15 ۇلتتىڭ وكىلى ءبىلىم الىپ ءجۇر
بۇل سىنىپتا 15 ۇلتتىڭ وكىلى ءبىلىم الۋدا، دەپ جازادى 24.kz.
قازاقستان حالقى اسسامبلەياسى جىلىنا وراي ولار اپتا سايىن «دوستىق» ساباعىن وتكىزۋدى قولعا الدى. ءار وقۋشى ءوز ۇلتىنىڭ كيىمىن كيىپ، ءوز تىلىندە ونەر كورسەتەدى. «ماقساتىمىز - ەلىمىزدىڭ كوپ ۇلتتىلىعىن، دوستىعىن ناسيحاتتاي وتىرىپ، باۋىرمالدىققا، بەيبىتشىلىككە تاربيەلەۋ. سەبەبى ەلىمىزدىڭ ەڭ باستى بايلىعى - ۇلتارالىق تاتۋلىق»، - دەيدى تاجىريبەلى ۇستازدار.
بۇگىنگى تاربيە ساعاتىندا 15 ۇلتتىڭ ءانى شىرقالدى، ۇلتتىق ءبي ورىندالدى. سەبەبى 1- «ب» سىنىبىندا قازاق، ورىس، كارىس، ارميان، ينگۋش، تاتار سياقتى 15 ۇلتتىڭ بالاسى وقيدى. ازەربايجان قىزى نازيليا ءوز تىلىندە دوستىق تۋرالى ولەڭ وقىسا، اسقار مەن ابدۋاليم نوگايەۆتار لەزگين ءبيىن بيلەدى.
بۇل بالالاردىڭ ءجۇزى باسقا بولسا دا جۇرەگى ءبىر، ءتىلى باسقا بولسا دا تىلەگى ءبىر، اتاسى باسقا بولسا دا وتانى ءبىر. مەكتەپ تابالدىرىعىن اتتاعالى 9 ايدىڭ ىشىندە وقۋشىلار ءبىر-بىرىنە باۋىر باسىپ، دوستاسىپ ۇلگەردى. سىنىپتاعى اۋىزبىرشىلىكتىڭ ارتا ءتۇسۋى ءۇشىن جاڭا جىلدان باستاپ ءار اپتا سايىن «دوستىق» ساباعى وتكىزىلە باستادى. تاربيەلىك ءمانى زور بۇل ساباق قازاقستان حالقى اسسامبلەياسى جىلى اياسىندا جىل بويى جالعاسادى.
بيىل ءوز ۇلتىنىڭ ونەرى مەن سالت-ءداستۇرىن مەڭگەرگەن كوپ ۇلتتى سىنىپتىڭ وقۋشىلارى كەلەر جىلدان باستاپ وزگە حالىقتاردىڭ مادەنيەتىن زەرتتەۋگە كىرىسپەك. باسقا تىلدە ءان ايتىپ، ءتۇرلى ۇلتتىڭ تاعامىن ازىرلەۋدى ۇيرەنبەكشى.
