رەسەي قورعانىس مينيسترلىگىندەگى بارلىق تۋ-154-تىڭ ۇشۋى توقتاتىلدى
«ر ف قورعانىس مينيسترلىگى تۋ-154 اۋە اپاتىنىڭ تەكسەرىس جۇمىستارى اياقتالعانعا دەيىن، اتالمىش ماركالى ۇشاقتاردىڭ بارلىعىنىڭ ۇشۋىن ۋاقىتشا توقتاتۋ تۋرالى شەشىم قابىلدادى»، - دەپ ءمالىم ەتتى دەرەككوز.
دەرەككوزدىڭ ايتۋىنشا، قازىرگى تاڭدا وسى ۇلگىدەگى ۇشاقتاردىڭ شەكتەۋلى سانى قولدانىستا بولعاندىقتان، بۇل شەشىم اۋە تاسىمالىنا كەدەرگى كەلتىرمەيدى. بۇدان بۇرىن ر ف كولىك ءمينيسترى ماكسيم سوكولوۆ تۋ-154ب-2 ماركالى ۇشاقتاردىڭ تەك قورعانىس مينيسترلىگىنە قىزمەت ەتىپ جاتقاندىقتان، ارى قاراي قولدانۋ تۋرالى شەشىمدى تەك وسى ۆەدومستۆو قابىلدايتىنىن ءمالىم ەتكەن.
ونىڭ ايتۋىنشا، ازاماتتىق اۆياتسيا تۋ-154م ماركالى ۇشاقتى پايدالانۋدا جانە كۇن تارتىبىندە ارى قاراۋ قولدانۋ تۋرالى شەشىم كۇن تارتىبىندە تۇرعان جوق.
ەسكە سالا كەتەيىك، 2016 -جىلدىڭ 25 -جەلتوقسانىندا استانا ۋاقىتى بويىنشا ساعات 08:27 دە تۋ-154 ۇشاعى سوچيدەن ۇشقاندارىنا ەكى مينۋت وتكەندە راداردان جوعالدى. ونىڭ بورتىندا ءۇش تەلەارنانىڭ - ن ت ۆ، «زۆەزدا» جانە «ءبىرىنشى» ارنانىڭ ءتۇسىرۋ توپتارى بولعان. اپاتقا ۇشىراعان 92 ادامنىڭ ىشىندە - توعىز جۋرناليست بولدى. ولار ءبىرىنشى ارنادان دميتري رۋنكوۆ، ۆاديم دەنيسوۆ پەن الەكساندر سويدوۆ، ن ت ۆ- دان ميحايل لۋجەسكي، ولەگ پەستوۆ پەن ەۆگەني تولستوۆ جانە «زۆەزدا» ارناسىنان پاۆەل وبۋحوۆ، الەكساندر سۋرانوۆ پەن ۆالەري رجەۆسكي قازا تاپتى. سونىمەن قاتار، بورتتا اسكەري قىزمەتكەرلەر، الەكساندروۆ اتىنداعى انسامبلدىڭ مۋزىكانتتارى، ءدارى-دارمەكتەردى سيرياعا الىپ بارا جاتقان دارىگەر ەليزاۆەتا گلينكا جانە قورعانىس مينيسترلىگى مادەنيەت دەپارتامەنتىنىڭ ديرەكتورى انتون گۋبانكوۆ بار ەدى.
