سەرىك احمەتوۆ پەن سوتتالعان وزگە شەنەۋنىكتەردەن 153,3 ميلليون تەڭگە ءوندىرىپ الىندى

قاراعاندى. قازاقپارات - قاراعاندىدا قازىبەك ءبي اۋدانىنىڭ №2 -سوتى قالا اكىمدىگىنىڭ تالاپ- ارىزى بويىنشا سىبايلاس جەمقورلىق قىلمىسى ءۇشىن سوتتالعان بۇرىنعى پرەمەر-مينيستر سەرىك احمەتوۆ پەن وزگە دە شەنەۋنىكتەردىڭ ازاماتتىق ءىسىن قارادى، دەپ حابارلايدى قازاقپارات ءتىلشىسى.

«مەملەكەتكە كەلگەن ماتەريالدىق شىعىندى وتەۋ تۋرالى ازاماتتىق ءىس ءىشىنارا قاناعاتتاندىرىلسىن. سەرىك احمەتوۆتەن، باۋىرجان ابدىشەۆتەن، مەيرام سماعۇلوۆتان، مۇحتار ادامبەكوۆتان، ايدوس جاكەنوۆتەن 41082708 تەڭگە مەملەكەت پايداسىنا، 85131104 تەڭگە جەرگىلىكتى بيۋدجەت كىرىسىنە ءوندىرىلسىن»، - دەپ جاريالادى ۇكىمدى قازىبەك ءبي اۋدانى №2 -سوتىنىڭ سۋدياسى دينارا تەگجانوۆا.

ودان بولەك، سوت قۇرىلىس تاۋارلارى، قۇرىلىس- ەكونوميكالىق كەشەندى سوت ساراپتامالارىن جۇرگىزۋ ءۇشىن كەتكەن شىعىنداردى جانە مەملەكەتكە تولەنۋى ءتيىس سالىقتى قوسا العاندا قۇرايتىن جالپى سوماسى 27 ميلليون تەڭگەنى ءوندىرىپ الدى.

سىبايلاس جەمقورلىق ءۇشىن سوتتالعان جوعارى لاۋازىمدى شەنەۋنىكتەردىڭ بارلىعىنان 153335711 تەڭگە ءوندىرىلدى. مالىمدەمەدە جاۋاپكەرلەردىڭ مەملەكەتكە شامامەن 201 ميلليون تەڭگە ماتەريالدىق شىعىن كەلتىرگەنى كورسەتىلگەن.

سوت قاۋلىسى زاڭدى كۇشىنە ەنگەن جوق جانە اپەللياتسيالىق ينستانسياعا قايتا شاعىم ءتۇسىرىلىپ، ءىس قايتا قارالۋى مۇمكىن.