احمەت بايتۇرسىن ۇلىنىڭ 150 جىلدىعى اياسىندا اللەيا اشىلدى
اللەيانىڭ تالدىقورعاندا اشىلۋىنىڭ ءوز ءمان- ماعىناسى بار. ءتىل ءبىلىمى ينستيتۋتىنىڭ عالىمدارى احمەت بايتۇرسىن ۇلى جەتىسۋ ءوڭىرى تۋرالى كوپ زەرتتەۋ جۇرگىزگەندىگىن ايتادى.
«جەتىسۋعا بايلانىستى دەرەكتەردى وتە جاقسى بىلگەن. مىنا جاقتا «مامانيا» مەكتەبى بار. قاپالداعى بارلىبەك سىرتتانوۆ مەكتەبى بار. قاپال ءوڭىرى تۋرالى «قازاق» گازەتىندە ۇدايى جازىپ وتىرعان»، - دەيدى ا. بايتۇرسىن ۇلى اتىنداعى ءتىل ءبىلىمى ينستيتۋتى ديرەكتورىنىڭ ورىنباسارى ەرمۇحامەت مارالبەك.
شاعىن ساياباق «ءتىل سارايى» عيماراتىنىڭ اۋلاسىندا ورنالاسقان. الاش ارداقتىسىنىڭ ەسىمىن ۇلىقتاۋعا كەلگەن عالىمدار مەن ءتىل جاناشىرلارى قىلقان جاپىراقتىلار جانە جەمىس اعاشتارىن وتىرعىزىپ، جەتىسۋدىڭ باس قالاسىن جاسىل جەلەككە اينالدىرۋعا ءوز ۇلەستەرىن قوستى.
جالپى، بيىل احمەت بايتۇرسىن ۇلىنىڭ مەرەيتويى حالىقارالىق دەڭگەيدە اتالىپ وتەدى. بىرنەشە مەملەكەتتە عىلىمي- كونفەرەنتسيالار ۇيىمداستىرىلىپ، قالامگەر شىعارمالارى مەن ەڭبەكتەرى باسپادان قايتا جارىققا شىعارىلماق. بۇعان دەيىن جازعانىمىزداي، بيىل احمەت بايتۇرسىن ۇلىنىڭ 150 جىلدىعى يۋنەسكو اياسىندا اتالىپ وتەدى.
