ۇشاقتا تەمەكى تارتقان قازاقستاندىق 150 مىڭ تەڭگە ايىپپۇل تولەۋى مۇمكىن
بۇل تۋرالى كولىكتەگى پوليتسيا دەپارتامەنتى باسپا ءسوز قىزمەتىنەن ءمالىم بولدى، دەپ حابارلايدى قازاقپارات.
«اقتوبە قالاسى اۋەجايىندا پوليتسيانىڭ جەلىلىك ءبولىمىنىڭ قىزمەتكەرلەرى 19 جاستاعى قازاقستان ازاماتىن ۇستادى. جاس جىگىت «الماتى- اقتوبە» باعدارىنداعى اۋە رەيسىندە تەمەكى تارتقان. سونىمەن قاتار ول ۇشاقتاعى تالاپتاردى ساقتاماعان، ياعني ۇشاق كومانديرى مەن ەكيپاج مۇشەلەرىنىڭ نۇسقاۋلارىن ورىنداماي، بالاعات ءسوز ايتقان. وسى ارقىلى ول قوعامدىق ءتارتىپتى بۇزعان»، - دەلىنگەن دەپارتامەنت مالىمەتىندە.
ۇشاقتاعى ءتارتىپتى بۇزعان جىگىتكە قاتىستى اكىمشىلىك ءۇش حاتتاما تولتىرىلدى. وسى ورايدا اۋە كەمەسى بورتىندا تەمەكى تارتۋ، ۇشاقتاعى ءتارتىپتى بۇزۋ جانە ۇساق بۇزاقىلىق ايىپتارى تاعىلىپ، 53 اەك كولەمىندە اكىمشىلىك ايىپپۇل سالىندى. ۇساق بۇزاقىلىق بويىنشا ماتەريال سوتقا جىبەرىلدى.
اۆتور: رۋسلان عابباسوۆ