قوستانايدا احمەت بايتۇرسىن ۇلىنىڭ 150 جىلدىعىنا 3 ميلليارد تەڭگەگە جۋىق قاراجات ءبولىندى

قوستاناي. قازاقپارات - قوستاناي وبلىسىنىڭ اكىمدىگى احمەت بايتۇرسىن ۇلىنىڭ 150 جىلدىعىن مەرەكەلەۋ بويىنشا وبلىستىق ءىس- شارالار جوسپارىن بەكىتتى.

بۇگىندە احمەت بايتۇرسىن ۇلى دۇنيەگە كەلگەن جانگەلدين اۋدانى تۇرعىندارىنىڭ ءومىرى مەن الەۋمەتتىك جاعدايىن جاقسارتۋ بويىنشا اۋقىمدى ينفراقۇرىلىمدىق جوبالار ىسكە اسىپ جاتىر. ول جايىندا بريفينگتە وبلىستىق مادەنيەت باسقارماسىنىڭ باسشىسى ەرلان قالماقوۆ ايتتى، دەپ حابارلايدى قازاقپارات ءتىلشىسى.

«وبلىس اكىمدىگى جوسپار اياسىندا تورعاي اۋىلىندا «احمەت بايتۇرسىن ۇلى مەن ءمىرجاقىپ دۋلات ۇلىنىڭ ادەبي مۋزەيىنە» رەەكسپوزيتسيا جانە جوندەۋ جۇمىسىن جۇرگىزىپ جاتىر. ول ءۇشىن بيۋدجەتتەن 170,5 ميلليون تەڭگە كولەمىندە قاراجات ءبولىندى. اۋدان ورتالىعىنان ا. بايتۇرسىن ۇلى اۋىلىنا دەيىنگى 41,4 ك م تاسجولعا جانە تورعاي وزەنىندەگى كوپىر جوندەلە باستادى. ول ءۇشىن رەسپۋبليكالىق جانە وبلىستىق بيۋدجەتتەن 2,7 ميلليارد تەڭگە ءبولىندى»، - دەدى ە. قالماقوۆ.

وسى جەردە، سارىتۇبەك قونىسى اۋماعىندا ورنالاسقان ا. بايتۇرسىن ۇلى اۋىلىندا جاڭا مەديتسينالىق پۋنكت سالىنىپ، اقكول اۋىلدىق امبۋلاتورياسى جوندەلىپ، سونداي- اق مەديتسينالىق جابدىقتار جاڭارتىلىپ جاتىر. وعان وبلىستىق بيۋدجەتتەن 62 ميلليون تەڭگە باعىتتالدى.

«سونداي- اق، ا. بايتۇرسىن ۇلى دۇنيەگە كەلگەن سارىتۇبەك قونىسى اقكول اۋىلىندا «احمەت بايتۇرسىن ۇلىنىڭ مۋزەي ءۇيى» قۇرىلىسى جوسپارلانعان. قازىرگى ۋاقىتتا جوبالىق- سمەتالىق قۇجاتتاما ازىرلەنىپ جاتىر. وبلىستىق بيۋدجەتتەن قوسىمشا قاراجات بەرىلدى»، - دەدى ۆەدومستۆو باسشىسى.

سونداي- اق، قازىر باسقارما دەمەۋشىلىك قاراجات ەسەبىنەن تورعاي اۋىلىندا احمەت بايتۇرسىن ۇلى مەن ءمىرجاقىپ دۋلاتوۆتىڭ قۇرمەتىنە ەسكەرتكىش ورناتۋ ماسەلەسىن قاراستىرىپ جاتىر. تاياۋ ۋاقىتتا اۋدانداعى شالعاي اۋىلداردى ينتەرنەتكە قوسۋ جوسپاردا بار. ينفراقۇرىلىم جوبالارىن ىسكە اسىرۋمەن قاتار، وبلىستا ۇلى تۇلعانىڭ رۋحاني مۇراسىن ناسيحاتتاۋعا باعىتتالعان مادەني- بۇقارالىق شارالار وتكىزىلەدى: حالىقارالىق عىلىمي- پراكتيكالىق كونفەرەنسيالار، ەكسپەديسيالار، بايقاۋلار مەن چەللەندجدەر جانە تاعى باسقالار. الاش كوشباسشىسىنا ارنالعان جاڭا سپەكتاكلدەر مەن تەاترلاندىرىلعان قويىلىمدار قويىلادى.

«بارلىق شارا قارجىلاي قامتىلىپ وتىر. جەرگىلىكتى بيۋدجەت ەسەبىنەن 2022-2023 وقۋ جىلىنىڭ تۇلەكتەرىنە پەداگوگيكالىق جانە ينجەنەرلىك- تەحنيكالىق ماماندىقتار بويىنشا احمەت بايتۇرسىن ۇلى اتىنداعى گرانت بەرىلەدى. وسى جىلى ءبىر جىلدا 750 مىڭ تەڭگەدەن 10 گرانت»، - دەپ تۇيىندەدى ە. قالماقوۆ.

اۆتور: اقبوپە ءابدراسۋل