15 جاسار قازاقستاندىق اتلەت قىتايدان ەكى بىردەي جۇلدەمەن ورالدى
استانا . قازاقپارات - 15 جاسار قازاقستاندىق اتلەت مۇرات نۇربولسىن قىتايدىڭ ءۇرىمجى قالاسىندا وتكەن جەڭىل اتلەتيكادان جاستار مەن جاسوسپىرىمدەر اراسىندا حالىقارالىق جارىستا ەكى بىردەي جۇلدەمەن ورالدى .
قۇرلىق مىقتىلارى قاتىسقان سايىستا قازاق ەلىنىڭ ۇل- قىزدارى دا باق سىناعان بولاتىن. وسى دودا دا مۇرات نۇربولسىننىڭ باعى جانىپ، 1500 مەتردە توپ جارسا، 3 مىڭ مەتردە كۇمىس جۇلدە يەلەندى.
«بۇل جارىستا 5 مەملەكەتتەن 300 دەن استام سپورتشى باق سىنادى. شاكىرتىم مۇرات نۇربولسىن ۇلىن جاتتىقتىرىپ جۇرگەنىمە 1 جىلدان استى 4 رەت قازاقستان چەمپيونى، 2 رەت كۇمىس جۇلدەگەر، 1 رەت قولا مەدال ەنشىلەگەن بولاتىن. بۇل جولعى حالىقارالىق باسەكەدە قاجىرلى ەڭبەگىمەن، جىگەرىنىڭ ارقاسىندا چەمپيون اتانىپ، ءبارىمىزدى قۋانتىپ وتىر. ونىڭ الداعى بولاشاعىنان ۇلكەن ءۇمىت كۇتەمىن. قازاقتىڭ كوك بايراعىن ءالى تالاي الەمدىك دودالاردا جەلبىرەتەدى دەپ سەنەمىن»، - دەيدى جاتتىقتىرۋشى باعداۋىر ۇلكەنباي.
استانا قالالىق №9 بالالار مەن جاسوسپىرىمدەردىڭ سپورت مەكتەبىندە جەڭىل اتلەتيكادان ترەنەر بوپ قىزمەت ىستەيتىن باعداۋىر ۇلكەنباي - قىتاي قازاقتارىنان شىققان تانىمال جاتتىقتىرۋشىلاردىڭ ءبىرى. ول تاربيەلەگەن شاكىرتتەر بەيجىڭ قالاسىنىڭ مارافونى سياقتى قىتايدىڭ ءىرى- ءىرى جارىستارىندا جۇلدە العان.
«مەن جاتتىقتىرۋشى رەتىندە جۇمىس جاساپ كەلە جاتقانىما 20 جىلدان استى. شاكىرتتەرىم ۇلكەن دودالاردا توپ جارىپ ءجۇر. اتاجۇرتقا كەلگەنىمە ءبىر جىلدان استى. ەندىگى ارمانىم - قازاقستاندا دا مىقتى سپورتشىلار تاربيەلەپ، كوك تۋىمىزدى جەلبىرەتىپ، ەلىمىزگە ۇلەسىمىزدى، ەڭبەگىمىزدى ءسىڭىرۋ. نۇربوسىن دا شەتەلدەن كەلگەن قازاق، باعىن اشىپ باپتاي بىلسە، ءالى تالاي قازاق بالاسى ەل ابىرويىن اسقاقتاتادى» ، - دەدى ءباعداۋىر ۇلكەنباي.
ريزابەك نۇسىپبەك ۇلى
