بەكبولات تىلەۋحان: قۇداي بەرگەن كوپ جارىم، 14 بالام بار

 استانا. قازاقپارات -ءماجىلىس دەپۋتاتى، ق ر ۇلتتىق سپورت قاۋىمداستىعىنىڭ پرەزيدەنتى بەكبولات تىلەۋحان جۇرت اراسىندا وربىگەن كوكپارعا قاتىستى داۋعا پىكىر ءبىلدىردى. ودان بولەك جەكە ومىرىنە قاتىستى ايتىپ ءوتتى.

كوكپار داۋىنان سوڭ جۇرت تاراپىنان بەكبولات تىلەۋحاننىڭ ورنىنا مۇحتارحا دىلدابەكوۆتى قويۋ تۋرالى ۇسىنىستار ايتىلدى. بۇعان قاتىست ءماجىلىس دەپۋتاتى ءوز ويىن ءبىلدىردى، دەپ جازادى Sputnik.

«وليمپيادا چەمپيونى ءارى كۇمىس جۇلدە يەگەرى مۇحتارحان دىلدابەكوۆتى جاقسى سپورتشى رەتىندە تانيمىن. بۇل ورىنعا لايىق دەپ تە ويلايمىن. ءبىراق باسقارۋ وڭاي دۇنيە ەمەس. ول جاقسى ازامات، مىقتى سپورتشى. ال باسقارۋ قابىلەتى قانداي ەكەنىن بىلمەيمىن. ەگەر جۇرت لايىق دەسە، شىنىندا لايىق بولعانى دا»، - دەدى ۇلتتىق سپورت قاۋىمداستىعىنىڭ پرەزيدەنتى.

جەلىدە كوكپارشىنىڭ ءبىرى ءوزىنىڭ ءبىر كۇن بۇرىن تەلەفون ارقىلى شاقىرتۋ العانىن، قازاقستان كوكپارشىلارىنىڭ دايىندىعى مۇلدە بولماعانىن ايتقان ەدى. الايدا بەكبولات تىلەۋحان ونىڭ ءسوزىن تەرىسكە شىعاردى.

«بۇل وتىرىك ءسوز. كوكپارشىلارىمىزدىڭ جاتتىعۋى ءۇشىن مينيسترلىكتەن قاراجات تا بولىنەدى، اتتار دا باپتالادى. قىرعىز ارناسى سوزدەردى قىسقارتىپ، مونتاجداپ تاستاعاندىقتان وسىنداي داۋ تۋىپ وتىر. كوپپارشىلاردىڭ بارلىعى دايىندالدى. تەك ءبىزدىڭ قوعامدا كوكپارعا دەگەن قىزىعۋشىلىق قىرعىزدارداي ەمەس»، - دەيدى ول.

ءماجىلىس دەپۋتاتى توقال الۋ ماسەلەسى مەن جەكە ومىرىنە قاتىستى سۇراقتارعا جاۋاپ بەرە كەتتى.

«توقال دەپ ايتۋ دۇرىس ەمەس، ەكىنشى نە ءۇشىنشى جار دەپ ايتۋ كەرەك. توقال دەپ ءمۇيىزى جوق سيىردى ايتاتىن ەدى. سوندىقتان بۇل ءسوز قۇلاققا جاعىمسىز ەستىلەدى. مەنىڭ قۇداي بەرگەن كوپ ايەلىم بار. ءبىراق ءسىز ايتقانداي بەسەۋ ەمەس. جانە سوڭعى كەزدە «بەكبولات تىلەۋحان 11 بالاسى بارىن مويىندادى دەپ شىعارىپتى. مەنىڭ 11 ەمەس، 14 بالام بار»، - دەدى ءماجىلىس دەپۋتاتى.