ۇ ب ت:- 140 بال جيناعان تۇلەك ارمانداعان وقۋ ورنىنا تۇسە المايدى
Sputnik قازاقستانعا سۇحبات بەرگەن شيارا ۇ ب ت- عا قالاي دايىندالعانىن جانە نە سەبەپتى ارمانىنداعى وقۋ ورنىنا تۇسە المايتىنىن ءتۇسىندىرىپ بەردى.
شيارا ۇ ب ت- عا 9-سىنىپتا وقىپ جۇرگەن كەزىنەن باستاپ دايىندالا باستاعان. ءوزىنىڭ ايتۋىنشا، ول قاتەلىكتەرمەن جۇمىس ىستەۋ ارقىلى ەڭ جوعارى كورسەتكىشكە قول جەتكىزىپ وتىر.
بويجەتكەن تەك قانا تەست كىتاپتارى ارقىلى ەمەس، 7-11- سىنىپ ارالىعىنداعى بارلىق وقۋلىقتاردى قايتا قاراپ شىققان. تۇلەكتىڭ تاڭداعان پاندەرى - گەوگرافيا مەن ماتەماتيكا.
كەشە عانا التىن ۇياسىنان ۇشقان تۇلەكتىڭ الدىندا ۇلكەن تاڭداۋ تۇر. لوگيست بولۋدى ارماندايتىن شيارا ءالى وقۋ ورنىن تاڭداپ ۇلگەرمەپتى. وكىنىشكە قاراي، ەڭ جوعارى ناتيجە كورسەتسە دە، الماتىلىق تۇلەك ارمانىنداعى ۋنيۆەرسيتەتكە تۇسە المايدى ەكەن.
«نازاربايەۆ ۋنيۆەرسيتەتىنە تۇسكىم كەلگەن. ءبىراق وكىنىشكە قاراي، وندا قۇجات قابىلداۋ ۋاقىتى ءوتىپ كەتىپتى. ەندى استاناداعى ەۋرازيا ۇلتتىق ۋنيۆەرسيتەتى مەن الماتىداعى سۇلەيمەن دەميرەل اتىنداعى ۋنيۆەرسيتەت اراسىندا تاڭداۋ جاساپ جاتىرمىن»، - دەپ ءبولىستى جاس تۇلەك.
بۇدان بولەك، شيارا تەستكە دايىندالۋ ءۇشىن ۇزاق ۋاقىت بويى تاڭعى ساعات 4 تە تۇرىپ كەلگەنىن جاسىرمادى.
«تاڭعى ساعات 4 تە تۇرىپ، شايىمدى ىشەتىنمىن. تەستتەردى قايتالاپ، كوپ كىتاپ وقىدىم. كەيىن مەكتەپكە، ال تۇسكى ءۇزىلىس كەزىندە ۇ ب ت- عا دايىندىق ورتالىقتارىنا باراتىنمىن. بارلىق ۇستازدارىما العىسىم شەكسىز»، - دەپ اتاپ ءوتتى شيارا.
