قوردايداعى توبەلەستە جاراقات العان 13 ادام قىرعىزستاندا ەمدەلىپ جاتىر
كەشە پرەمەر- ءمينيستردىڭ ورىنباسارى بەردىبەك ساپاربايەۆ جامبىل وبلىسىنا شۇعىل جەتتى. مەملەكەت باسشىسى قاسىم- جومارت توقايەۆتىڭ تاپسىرماسىنا ساي، ۇكىمەتتىك كوميسسيانى باستاپ بارعان ۆيتسە- پرەمەر، ءوڭىر باسشىسىمەن بىرگە العاشقى بريفينگ وتكىزدى.
7 - قاڭتار كۇنى كەشكى ساعات التى جارىم شاماسىندا قاراكەمەر مەن ىرگەلەس جاتقان ماسانچي اۋىلى تۇرعىندارى اراسىندا قاقتىعىس ورىن الدى. تاياق- تاسپەن قارۋلانعان بۇلىكشىلەر ۇيلەردىڭ تەرەزەسىن سىندىرىپ، كولىكتەر مەن دۇكەندەردى ورتەي باستادى.
بۇلىك سالدارىنان 8 ادام قازا تاپتى. 123 ادام مەديتسينالىق كومەككە جۇگىندى. ونىڭ ىشىندە 39-ى وق جاراقاتىن العان.
تاعى 43 ادام اۋرۋحانادا ەم قابىلداپ جاتىر. جەتەۋى - جانساقتاۋ بولىمىندە. 13 ادام تۋىسقاندارىنىڭ كومەگىمەن كورشى قىرعىز ەلىندەگى توقماق اۋرۋحاناسىنا جەتكىزىلدى.
وقيعا ورنىندا 14 جەدەل جاردەم بريگاداسى مەن 39 دارىگەر مەديتسينالىق كومەك كورسەتىپ جاتىر. 19 ارنايى تەحنيكا، 12 ءورت ءسوندىرۋ كولىگى مەن توتەنشە جاعدايلار دەپارتامەنتىنىڭ 80 قىزمەتكەرى جۇمىلدىرىلدى.
«ءبىر اللاعا شۇكىرشىلىك ايتامىن. بەيبىتشىلىكتى تۋ ەتكەن وسىنداي ەلدە تۇرىپ جاتقانىمىز ءۇشىن ۇكىمەتكە العىسىمىزدى بىلدىرەمىز. جەرلەستەر، ەشقانداي اراڭداتۋشىلىققا جول بەرمەڭدەر. سان جىلدار بويى تاتۋ- ءتاتتى ءومىر ءسۇرىپ كەلدىك. ساناۋلى ادامداردىڭ تۇرمىستىق سيپاتتاعى ماسەلەسىنە بولا، كۇللى ەلدىڭ مازاسىن الدىق. ءبىزدىڭ، اقساقالداردىڭ دا قاتەلىگى بارىن جاسىرمايمىز. قاريالار جاستار اراسىندا ءتۇسىندىرۋ جۇمىستارىن ءجيى جۇرگىزىپ وتىرۋ كەرەك»، - دەيدى سورتوبە اۋىلى ارداگەرلەر كەڭەسىنىڭ ءتوراعاسى يسمار ۆوينتسە.
وسىلايشا، ۇكىمەت كوميسسياسىنىڭ ءبىرىنشى تاپسىرماسى - بۇلىكتىڭ باستالۋ سەبەبىن انىقتاۋ. ەكىنشىدەن، الەۋمەتتىك- ەكونوميكالىق جانە گۋمانيتارلىق سيپاتتاعى كومەك كورسەتۋ شارالارىن قولعا الۋ. ۇشىنشىدەن، جەرگىلىكتى اكىمدىكپەن بىرلەسە، قازا تاپقانداردىڭ جەرلەۋ ءراسىمىن ۇيىمداستىرۋى قاجەت .
زارداپ شەككەندەرگە مەديتسينالىق كومەك كورسەتىپ، ولاردىڭ ماتەريالدىق شىعىنىن وتەۋى شارت. مەملەكەت باسشىسى قاسىم- جومارت توقايەۆ بۇگىن اقوردادا وتكەن شۇعىل جينالىستا ۇكىمەت كوميسسياسىنا وسىنداي تاپسىرما بەردى.
