اقتوبەلىك 13جاسىندا رولگە وتىرعان ارۋ جۇك كولىكتەرىن جوندەپ ءجۇر

الينا ەسەنگەلدينوۆا كولىك جوندەۋ ورتالىعىنا العاش رەت 13 جاسىندا باردى. سودان بەرى الىسقا ۇزاپ كەتكەن ەمەس. ورتالىققا قاجەتتى قۇرال- جابدىقتاردى اكەلۋ، ىسكە قوسۋ، عيماراتتى ارلەۋ جۇمىستارىنىڭ ءبارى كوز الدىندا ءوتتى.

«اقتوبە قالاسىنداعى دارىندى بالالارعا ارنالعان مەكتەپ- ينتەرناتتا وقىپ، كووپەراتيۆتىك كوللەدجگە وقۋعا ءتۇستىم. م. دۋلاتي اتىنداعى تاراز مەملەكەتتىك ۋنيۆەرسيتەتىنىڭ سىرتتاي ءبولىمىن ءتامامداپ، كەيىن ماگيستراتۋرانى ءبىتىردىم. جوعارى وقۋ ورنىن ۇزدىك ءبىتىرىپ، تۋعان جەرگە قايتا ورالدىم. قارجىگەرمىن، كاسىپتى كوركەيتكىم كەلەدى. كولىك جوندەۋ ورتالىعىندا بارلىعى 4 جۇمىسشى بار. مۇندا تەمىر جونىلىپ، جۇك كولىكتەرىنىڭ موتورى جينالادى. ماسەلەن، كليەنت كەلەدى، يىندىبىلىكتى تاپسىرىپ، ءبىز قابىلدايمىز. ولشەپ، ونى جونادى. ەگەر تەمىر جونۋشى بولماسا، ءبارىن ءوزىم ىستەيمىن»، - دەدى شەبەر الينا ەسەنگەلدينوۆا.

 جاس كاسىپكەر قازىر جوندەۋ ورتالىعىنىڭ بارلىق قۇجاتتارىن ءوزى تولتىرىپ، مەملەكەتتىك كىرىستەر دەپارتامەنتىنە ەسەپ تاپسىرادى. ارمانى - ورتالىقتى كەڭەيتىپ، قوسالقى بولشەكتەر ساتاتىن دۇكەن اشۋ، جاڭا قۇرال- جابدىقتار ساتىپ الىپ، ايەلدەردى جۇمىسقا ورنالاستىرۋ.

«اكەم شاعىن اۆتوبۋستى جۇرگىزۋدى 13 جاسىمدا ۇيرەتتى. ونىڭ الدىندا سكۋتەر جۇرگىزدىم. قازىر جەڭىل كولىكپەن جۇرەمىن. ارينە، ەر ادامدار جۇك كولىكتەرىن جوندەيتىن تەحنيكالىق ورتالىقتان مەنى كورگەندە تاڭعالادى، كەيبىرى كەڭەس سۇرايدى. ال اعالارىمىز «باتىر قىز» دەپ باتاسىن بەرەدى، ريزا بولادى. سول كەزدە مارقايىپ قالامىن. كۇمانمەن قارايتىن ادامدار شيراق قيمىلىم مەن جۇمىسىمدى كورىپ، رايىنان قايتادى. مەن جاڭا قۇرال- جابدىق الىپ، ايەلدەردى ەڭبەككە ارالاستىرعىم كەلەدى. ول كەزدە ءبارى اۆتوماتتاندىرىلادى»، - دەدى ول.

 الينا ەسەنگەلدينوۆا كولىك جۇرگىزەتىن جاس جىگىتتەردىڭ تەحنيكامەن ءىسى بولمايتىنىن جاسىرمايدى. ياعني، رولگە وتىرعانىمەن، ولار قوسالقى بولشەكتەرىن دە ايىرا المايدى. «جاس جىگىتتەر كولىكتىڭ رولىنە وتىرعانىنا ريزا. ولار قوسالقى بولشەكتەردى ءبىر- بىرىنەن ايىرا المايدى. مۇنداي جاعداي ءجيى كەزدەسەدى»، - دەدى ا. ەسەنگەلدينوۆا.

 كاسىپكەر تاڭمەن تالاسا تۇرىپ، كەشكە دەيىن جۇمىستا جۇرەدى. اراسىندا ءوز قىزمەتكەرلەرىنىڭ ورنىن اۋىستىرادى، تەمىر جونىپ، يىندىبىلىكتى ولشەيدى. الينانى اكەسى ءومىرباي قالباي ۇلى قىزىنىڭ قىزىعۋشىلىعىنا شەك قويمادى. ءبىراق ۋاقىت ءبولىپ، ارنايى ۇيرەتپەگەنىن ايتىپ بەردى. اكە جانىندا جۇرگەن قىزى ءبارىن ءوزى كورىپ، ويعا ءتۇيىپ، بۇلجىتپاي قايتالادى. وسىلايشا كاسىبي مامان بولدى.

«تەمىر- تەرسەككە بايلانعان ادامنىڭ شىعۋى قيىن سياقتى. قىزىم ەر بالالارعا بەرگىسىز مىقتى. ءارى بۇل سالانىڭ مامانىنا اسا ۇلكەن بىلىكتىلىك پەن ءتوزىمدى قاجەت. زامانىنان بولار دەپ ويلايمىن، كەيبىر ەر ادامدار موتور جيناپ، يىندىبىلىكتى جونۋدى، ولشەۋدى بىلمەيدى. ءوزىمنىڭ 36 جىلدىق تاجىريبەم بار. قىزىم مەن بىلەتىن جۇمىستىڭ ءبارىن يگەرگەن. جۇمىسشىلارىم دا تۇراقتى. ەگەر اۋىرىپ، باسقا جاعداي بولسا، ءوزىمىز كومەك كورسەتەمىز»، - دەدى ءومىرباي قالباي ۇلى.

تەحنيكالىق جوندەۋ ورتالىعىنىڭ كليەنتتەرى دە تۇراقتى. مۇندا ەگىن شارۋاشىلىعىنا قاجەتتى كولىكتەردىڭ ءبارى جوندەلەدى. تراكتور، ك-700، كاماز سەكىلدى ارنايى تەحنيكالاردىڭ ءبارى وسى جەرگە ايالدايدى. اقتوبەلىك شارۋالاردى دەر كەزىندە جەر جىرتۋ جۇمىسىنا دايىندايتىن ورتالىق وبلىس ورتالىعىندا نەكەن- ساياق. الداعى ۋاقىتتا ورتالىقتىڭ اۋماعى مەن قىزمەتى ارتىپ، قۇنى 135 مىڭ دوللار تۇراتىن تەحنيكانى ساتىپ الۋ جوسپارلاندى.