الماتىلىق 13 جاسار قىز سودىرعا عاشىق بولىپ، سيرياعا بارماق بولعان
وزگە مەملەكەتتەر سەكىلدى قازاقستاندا ۇيىمداسقان لاڭكەستىك جوق. تەك ءار جەردە وشاقتارى كەزدەسىپ جاتىر. ءبىزدىڭ ماقسات - سول وشاقتاردىڭ تاراپ كەتۋىنە جول بەرمەي، كۇرەسۋ.
ءبىر سەبەپ - قۇندىلىقتار داعدارىسى. ءبىزدىڭ جاستار ءۇشىن يدەال بولاتىن ادام جوق. يدەالداردىڭ جوقتىعىنان 13 جاستاعى الماتىلىق قىز تەلەارنا ارقىلى كورگەن سودىردى ىزدەپ، سيرياعا بارماق بولدى. بۇل تۋرالى ق ر پرەزيدەنت جانىنداعى ستراتەگيالىق زەرتتەۋلەر ينستيتۋتىنىڭ ديرەكتورى ەرلان قارين وڭىردەگى ۇكىمەتتىك ەمەس ۇيىم، پارتيا وكىلدەرىمەن كەزدەسۋىندە ايتتى، دەپ حابارلايدى Bnews.kz ءتىلشىسى.
«ماۋسىم ايىندا بولعان وقيعالاردى ايتقان كەزدە تەرروريزمنىڭ الەمگە ءتونىپ تۇرعان قاۋىپ ەكەنىن ۇمىتپاعان ءجون. وتكەن جىلى الەمدەگى 95 ەلدە 11 مىڭعا جۋىق تەرروريستىك شابۋىل بولعان. جىل سايىن ءبىر ەل قوسىلىپ كەلەدى. سولاردىڭ قاتارىندا قازاقستان دا بار. ماسەلە شەشىلدى، قاۋىپ- قاتەر جوق دەپ ءبىر- ءبىرىمىزدى جۇباتىپ قانا قويماي، وبەكتيۆتى تۇردە ايتۋىمىز قاجەت. قاۋىپ- قاتەر بار. مەملەكەت تەرروريزممەن كۇرەس جولىندا بارلىق جۇمىستى 90- جىلداردان بەرى جۇرگىزىپ كەلەدى. كوپتەگەن ەلمەن سالىستىرعاندا، قازاقستاندا ۇيىمداسقان تەرروريستىك وقيعا بولعان ەمەس. ءار جەردەگى راديكالدى توپتار، وشاقتار بار. ءبىزدىڭ ماقسات - سول وشاقتاردىڭ تاراپ كەتۋىنە جول بەرمەي، كۇرەسۋ» ، - دەدى ينستيتۋت ديرەكتورى.
ساياسات تانۋشى ە. قاريننىڭ ايتۋىنشا، كۇرەس جولىندا بىرنەشە فاكتوردىڭ جيىنتىعىمەن جۇمىس ىستەۋ كەرەك. قۇقىق قورعاۋ ورگاندارى، تەولوگتار مەن يمامدار، مەملەكەتتىك ورگاندار سەكىلدى ءار سالانىڭ ءوز اتقاراتىن ءىسى بار.
«الەۋمەتتىك، ەكونوميكالىق سەبەپتەردى جوققا شىعارمايمىز، ءبىراق نەگىزگى ماسەلە ول - قۇندىلىقتار داعدارىسى. جاڭا يدەالدار جوق. يدەالداردىڭ دەفورماتسياسى بولىپ جاتىر. بۇرىن اتامىز، اكەمىز ۇلگى بولدى. ولاردىڭ قاس- قاباعىنان قورقاتىن ەدىك. ال جاستاردىڭ تابىناتىن كەيىپكەرلەرى وتە جەڭىل بولىپ كەتتى. وتكەن جىلى 13 جاسار الماتىلىق قىز سيرياعا كەتىپ قالا جازدادى. جاقسى وقيدى، مەكتەپتىڭ قوعامدىق ومىرىنە بەلسەنە ارالاسادى. ءبىر كۇنى ول باسقا قالاعا جول ءجۇرىپ، سول ارقىلى سيرياعا وتپەكشى بولعان. ماقساتى نە؟ ءدىن ماسەلەسى ەمەس، سيريادا نە بولىپ جاتقانىن بىلمەيدى دە. ءبىر كۇنى جاڭالىقتاردان راديكالداردى كورسەتىپ جاتادى. سول كەزدە سودىردىڭ وبرازىن كورىپ، 13 جاسار قىز عاشىق بولىپ، ىزدەپ بارماق بولادى. قولىنا قارۋ السا دا ول قىز سول كەيىپكەرگە قىزىقتى» ، - دەيدى ساياساتتانۋشى.
ايتا كەتەيىك، ق ر پرەزيدەنت جانىنداعى ستراتەگيالىق زەرتتەۋلەر ينستيتۋتىنىڭ ديرەكتورى ەرلان قارين 2 كۇن بويى 4 اۋداندى ارالاپ، تۇرمەدە وتىرعان لاڭكەستەرمەن دە سويلەستى.