قاڭتار وقيعاسىمەن ۇستالعانداردى ازاپتاعاندار بويىنشا 133 قىلمىستىق ءىس قوزعالدى

نۇر- سۇلتان. قازاقپارات – ق ر باس پروكۋرورىنىڭ ورىنباسارى ەرلىك كەنەنبايەۆ قاڭتار وقيعاسىنا بايلانىستى ۇستالعانداردىڭ قۇقىعىن بۇزعانداردىڭ ۇستىنەن نەشە ءىس قوزعالعانىن ايتتى، دەپ حابارلايدى قازاقپارات ءتىلشىسى.

«زاڭسىز ءىس-ارەكەتتەر، ونىڭ ىشىندە ازاپتاۋلار تەرگەۋدىڭ باستاپقى كەزەڭىندە بولادى. ادامداردى وقيعا ورنىنان پوليتسياعا اپارعان سوڭ ولار تەرگەۋشىمەن نەمەسە جەدەل ۋاكىلمەن وڭاشا قالادى. جەدەل قىزمەتكەرلەر ۇستالعاندارمەن «جۇرەكجاردى اڭگىمە» جۇرگىزۋ ءۇشىن پروتسەسسۋالدىق سيپاتتان تىس قارىم-قاتىناستارعا جول بەرەدى. ۇستالعانداردىڭ كوبى ءوز قۇقىقتارىن بىلمەيدى، قورعاۋشى تالاپ ەتىپ جاتپايدى. پوليتسيا بۇل جايتتى كوپ جاعدايدا وزدەرىنە پايدالانادى. سەبەبى ۇستالعان ادامدارمەن جۇمىس جۇرگىزۋدىڭ ناقتى رەتتەلگەن ءتارتىبى جوق. قاڭتارداعى وقيعالار بۇعان ايقىن دالەل»، - دەدى باس پروكۋروردىڭ ورىنباسارى.

سونداي-اق ول قاڭتار وقيعاسى بويىنشا پروكۋراتۋرا ورگاندارىنا تۇسكەن شاعىمداردىڭ قالاي قارالىپ جاتقانىن باياندادى.

«12-قاڭتاردا الماتى پروكۋراتۋراسى زاڭسىز قاماۋدا وتىرعان قالانىڭ 24 تۇرعىنىن بوساتتى. اتالعان فاكتى بويىنشا ارنايى پروكۋرور تەرگەۋ جۇرگىزۋدە. پروكۋرورلار ۋاقىتشا ۇستاۋ يزولياتورلارىنان نەگىزسىز ۇستالعان 96 ادامدى بوساتتى. سونىمەن بىرگە ارەكەتتەرىنىڭ اۋىر بولماۋىنا بايلانىستى 92 ادامدى بۇلتارتپاۋ شاراسى وزگەرتىلدى. ۇستالعان ادامدارعا قاتىستى قۇزىرەتتى اسىرىپ پايدالانۋ، ءولىم، ازاپتاۋ فاكتىلەرى بويىنشا ىستەر تەرگەلىپ جاتىر. بۇل سيپاتتاعى 133 قىلمىستىق ءىس تەرگەلۋدە. بارلىق ىستەردىڭ وبەكتيۆتى ءوتۋى ءۇشىن پروتسەسسۋالدىق پروكۋرورلار بەلگىلەندى. ۇستالعان تۇلعالارعا مەديتسينالىق كومەك قامتاماسىز ەتىلدى. قازىرگى تاڭدا قاماۋدا وتىرعان جانە ۇستالعان 27 ادامعا قاجەتتى مەديتسينالىق كومەك كورسەتىلىپ وتىر» - دەدى ەرلىك كەنەنبايەۆ.