ەلوردادا 130 جەتكىنشەك جاس سارباز اتاندى
سالتاناتتى شارادا «جاس سارباز» بالالار ستۋدياسىنىڭ 130 تاربيەلەنۋشىسى كوپشىلىك الدىندا قازاقستان رەسپۋبليكاسىنىڭ اتا زاڭى مەن باسقا دا زاڭدارىن قاتاڭ ساقتاۋعا، پاتريوتتىق رۋحتى بيىك قويىپ، وتاندى قورعاۋعا، ونىڭ مۇددەسىن بارىنەن بيىك قوياتىنىن ايتىپ، ءسوز بەردى.
شاكىرتتەرگە ق ر قارۋلى كۇشتەرى باس شتابى باستىعىنىڭ ورىنباسارى، گەنەرال-مايور مۇحامەدجان تالاسوۆ «جاس سارباز» ۇيىمى تاربيەلەنۋشىسىنىڭ كۋالىگىن تابىس ەتىپ، جاس ساربازدارعا تولاعاي تابىس پەن وقۋدا ساتتىلىك تىلەدى.
«ءبىزدىڭ وتانىمىز - قازاقستان رەسپۋبليكاسىنىڭ لايىقتى ازاماتتارى جانە پاتريوتتارى بولىڭىزدار. ەلباسى ايتقانداي، «ءوز وتانىڭدى ءسۇيىپ، قادىر-قاسيەتىن ەشقاشان تۇسىرمە، قازاقستاندى ءوز جۇرەگىڭدە ماقتانىشپەن الىپ جۇرىڭدەر»، - دەپ مۇحامەدجان قادىرجان ۇلى شاكىرتتەردى قۇتتىقتادى.
بۇگىنگى كۇنى ەلىمىزدە اسكەري-پاتريوتتىق باعىتتاعى وسىنداي 6198 سىنىپ پەن كلۋب جۇمىس ىستەۋدە. وعان 179224 تاربيەلەنۋشى مۇشە. انت قابىلداۋ ءراسىمى جاستارعا اسكەري-پاتريوتتىق تاربيە بەرۋدە جان-جاقتى دامىتۋعا، جوبالاردى ىسكە اسىرۋعا، اسكەري-پاتريوتتىق ءىس-شارالارعا قاتىسۋعا باعىتتالعان ىنتىماقتاستىقتى ورناتۋعا ارنالادى. ءىس-شارانىڭ ماقساتى - وسكەلەڭ ۇرپاققا اسكەري- پاتريوتتىق تاربيە بەرۋ، ولاردىڭ بويىندا وتانعا دەگەن سۇيىسپەنشىلىك سەزىمىن وياتۋ.
شارا «جاس سارباز» بالالار ستۋدياسىنىڭ تاربيەلەنۋشىلەرى دايىنداعان كونسەرتتىك باعدارلاماعا ۇلاستى.
