13 ادام قازا بولدى: الماتى حوستەلى ورتكە دەيىن
ءورت شىعىپ، 13 ادام قازا بولعان الماتىداعى حوستەل قالا ورتالىعىنداعى المالى اۋدانى، ءادي ءشارىپوۆ كوشەسى، 86 مەكەنجايىندا ورنالاسقان، دەپ حابارلايدى Kazinform.
«Almaty Hostel» اتالاتىن جاتاقحانا تۇرىندەگى پاناجاي تەرەزەلەرى جوق جەرتولەدە جاساقتالعان.
2Gis ەلەكتروندى انىقتامالىق سەرۆيسكە ورنالاستىرىلعان مالىمەتكە سۇيەنسەك، حوستەلدە تۇرۋ ءبىر ورىنعا 2000 تەڭگەدەن باستالادى، ورىندار سانى - 100گە دەيىن.
الماتى قالالىق توتەنشە جاعدايلار دەپارتامەنتىنىڭ باسشىسى نۇرلان اتىعايەۆتىڭ سوزىنشە، جاتاقحانا 1,5 اي بۇرىن اشىلعان. مۇندا كوبىنە وزبەكستان، قىرعىزستان، پاكىستان ەلدەرىنىڭ ازاماتتارى تۇرعان. اراسىندا قازاقستاندىقتار دا بولعان.
مەرت بولعان 13 ادامنىڭ دەنى مەديتسينا ۋنيۆەرسيتەتىندە وقيتىن شەتەلدىك ستۋدەنتتەر بولعاندىعى تۋرالى اقپاراتتى اگەنتتىك ءتىلشىسى ناقتىلاپ جاتىر.
ەسكە سالايىق، بۇگىن تاڭەرتەڭ بولعان ءورت سالدارىنان 13 ادام كوز جۇمدى. 59 ادام شۇعىل ەۆاكۋاتسيالاندى. 56 سى جاقىن ماڭداعى مەكتەپكە ۋاقىتشا ورنالاستىرىلدى.
اۆتور
گۇلميرا الياكپاروۆا
